Ապրիլի 12-ին Արագածոտնի մարզի Թալին քաղաքում բացվեց կարի փոքր արտադրամաս, որը քաղաքում նոր 7 աշխատատեղ է ապահովում: Դա իրականացվել է Հայաստանում գործող «Դիակոնիա» բարեգործական հիմնադրամի և հոլանդացի հովանավորների ջանքերով:
Արտադրամասը նախնական ֆինանսավորում ստացել է հիմնադրամից ու հովանավորներից որպես նվեր ստացել 10 նոր ու բազմաֆունկցիոնալ կարի մեքենաներ, ինչպես նաև նախնական հումք` կտորներ և թելեր` աշխատանքները սկսելու համար: Ծրագրով նախատեսվում է, որ հետագայում արտադրամասը պետք է գործի ինքնաֆինանսավորմամբ. կարի պատվերներ ընդունելով և կատարելով` իր գործունեության համար բյուջե ձևավորի: Ծրագրի մյուս կետով էլ նախատեսվում է եկամտի մի մասը օգտագործել բարեգործական նպատակներով: Քանի որ արտադրամասը գործում է Թալինի թիվ 3 մանկապարտեզի շենքում, արտադրամասը պետք է ստացած եկամտի մի մասը օգտագործի հենց այս մանկապարտեզի տարբեր խնդիրների լուծման համար: Դա կարող է լինել մանկապարտեզի վերանորոգում, նոր գույքի ձեռք բերում և նմանատիպ այլ հարցեր:
Արտադրամասի բացման արարողությանը ներկա էին Արագածոտնի մարզպետ Սարգիս Սահակյանը, Թալինի քաղաքապետ Սարգիս Արամյանը, ինչպես նաև «Դիակոնիա» բարեգործական հիմնադրամի տնօրեն Պարույր Ջամբազյանը:
.gif)
