Երևանի քաղաքապետարանը հերքում է տարածել վերջերս զանգվածային որոշ լրատվամիջոցների կողմից տարածվող այն հայտարարության մասին, թե իբր Երևանի քաղաքապետը անտեսել է եզդիների խնդրանքը՝ Ջահանգիր աղայի անվամբ փողոց անվանակոչելու վերաբերյալ: Նշված հայտարարությանն ի պատասխան՝ Երևանի քաղաքապետի խորհրդական Գագիկ Բաղդասարյանը տեղեկացնում է.
«Ազգությամբ եզդի Ջահանգիր աղայի անվամբ փողոց անվանակոչելու առաջարկ քաղաքապետարանը, իսկապես, ստացել է դեռևս 2012 թվականին, Սինջար եզդիների ազգային միավորման կողմից, Բորիս Թամոյանի ստորագրությամբ։ Փողոցի անվանակոչման առաջարկությունը, Տեղական ինքնակառավարման մասին օրենքի համաձայն, իհարկե պետք է քննարկվի Երևանի ավագանու նիստում, ինչի համար անհրաժեշտ է համապատասխան տեղեկություններով փաթեթ, ինչն էլ խնդրել ենք առաջարկության հեղինակից և ստացել ենք։ Դրանից հետո հարցը քննարկվել է Երևանի ավագանու համապատասխան հանձնաժողովում, որից հետո ամբողջական փաթեթը պետք է ներկայացվեր Երևանի ավագանու քննարկմանը, ինչի մասին էլ Երևանի քաղաքապետը հեղինակին ասել էր։
Սակայն քննարկման փուլում առաջ եկած փաստաթղթային որոշ անհամապատասխանությունների և նյութերի թերի լինելու պատճառով հարցը անցել է քննարկման մեկ այլ փուլ։ Հարկ է նկատել, որ մեկ կամ երկու կազմակերպության առաջարկը բավարար չէ ամբողջ համայնքի անունից ներկայացնելու համար, մինչդեռ առաջարկությունը արված էր եզդի համայնքի անունից։ Այդ պատճառով դիմեցինք Եզդիների ազգային միության նախագահ Ազիզ Թամոյանին և տեղեկացանք, որ առաջարկությունը, որը արվել է համայնքի անունից, ընդունելի չէ։ Ազիզ Թամոյանը ընդգծել է, որ եթե առաջարկություն է արվում համայնքի անունից, ապա պետք է քննարկված լինի միության ղեկավարության հետ և միայն միության գրությունը կարող է համարվել եզդի համայնքի կողմից առաջարկություն։
Եզդիների ազգային միության նախագահը համաձայնություն չի տվել, որ այդ առաջարկը քննարկվի համայնքի անունից, և խնդրել է ընթացք չտալ, մինչև միության կողմից համապատասխան միջնորդություն չլինի։ Նույն տեսակետն է հայտնել նաև ՀՀ նախագահի աշխատակազմին կից ՀՀ ազգային փոքրամասնությունների ազգամշակութային կազմակերպությունների համակարգող խորհրդի եզդի ազգաբնակչության ներկայացուցիչ Սիաբանդ Բաքոյանը։
Կարծում ենք՝ որևէ ազգային համայնքի անունից առաջարկությունները պետք է միասնական լինեն, առանց ներքին տարաձայնությունների», – պարզաբանել է Գագիկ Բաղդասարյանը և հոդվածում հնչած ազգային խտրականության ակնարկին ի պատասխան էլ հիշեցրել, որ Ջահանգիր աղան Երևանում մեծարվել է հուշարձանով, որը տեղադրված է Նոր Նորք վարչական շրջանում, ուր ամեն տարի մայիսին եզդի և հայ ժողովուրդը հարգանքի տուրք է մատուցում Սարդարապատի հերոսամարտի հաղթանակում մեծ ներդրում ունեցած եզդի հերոսին, ինչպես նաև նշել, որ Վազգեն Սարգսյանի անվան ռազմական ինստիտուտում Ջահանգիր աղայի անունով լսարան է անվանակոչված։
.gif)
