ՀՀ նախագահին կից հանրային խորհուրդը հոկտեմբերի 30-ին քննարկում էր կազմակերպել ԱԳՆ շենքի վաճառքի արդեն իսկ կայացած գործարքի շուրջ: Խորհուրդը նամակով պետք է դիմի ՀՀ նախագահին՝ շենքի վաճառքի գործընթացը չեղյալ հայտարարելու համար: Հնարավո՞ր է՝ ՀՀ կառավարությանն առընթեր պետական գույքի կառավարման վարչությունը վերանայի իր որոշումը: «Ժողովուրդ»-ի այս հարցին վարչության պետ Արման Սահակյանը պատասխանեց.
-Մեծ լսարանում խնդիրը քննարկելու գաղափարը, բնականաբար, ողջունելի է: Ճիշտն ասած, ակնկալում էի, որ այնտեղ առողջ երկխոսություն, բազմակարծություն կլինի, եւ մեր հասարակական գործիչները կփորձեն խորամուխ լինեն գործարքի էության մեջ` փորձելով խնդրի իրավական, տնտեսական կողմերը քննարկել եւ ոչ թե էմոցիոնալ գնահատականներ տալ:
-Ձեր կարծիքով՝ ինչո՞ւ հաղթեց էմոցիան:
-Զարմացած եմ, որ նման կարեւոր հասարակական կառույցը ներկայացնող որոշ անձինք, շեշտում եմ՝ որոշ անձինք, կարող էին թույլ տալ իրենց որակումների մեջ անպատշաճ լինել: Ընդ որում, հանրային հնչեղություն ստացած գործարքի հրապարակավ ներկայացված մանրամասներից գրեթե անտեղյակ էին: Այնպիսի տպավորություն էր, որ ոմանք պարզապես ամբիոնի եւ խոսափողի կարիք ունեին եւ հարմար առիթի էին սպասում՝ բարձրաձայն ընդդիմանալու: Այսինքն՝ խնդիր ունեին խոսելու: Հատկապես բարոյականությունից խոսողներից մեկի վարքագիծն ինձ հիշեցրեց մի ասացվածք. «Գողն ամենաբարձրն է գոռում՝ բռնե՛ք գողին»:
-Ո՞ւմ նկատի ունեք:
-Ես մարդկանց անուններ չեմ տա, քանի որ այնտեղ խոսում էին մարդիկ, որոնք ժամանակին սեփականաշնորհման գործընթացի հանձնաժողովների մեջ են ներգրավված եղել: Ընդհանրապես, պատժի ենթարկելու վերաբերյալ պետք է դիմել անցյալին, եւ այդ տիպի մարդկանց է պետք պատժել: Դուք ինձանից լավ գիտեք անունները:
-Եթե Սերժ Սարգսյանը որոշի պատժել գործարքն իրականացնողներին, ի՞նչ եք անելու:
-Ըստ անհրաժեշտության՝ մենք փորձելու ենք Սերժ Սարգսյանին ներկայացնել գործարքի հետ կապված բոլոր հիմնավորումները` չնայած դա արել ենք: Մենք հանրությանը եւս ներկայացրել ենք բոլոր իրավական հիմնավորումները, քանի որ այս գործարքը բխում է միմիայն պետության շահերից:
-Շատերի կարծիքով՝ Հանրային խորհուրդը ձեւական կառույց է, համամի՞տ եք:
-Այդպիսի տպավորություն չունեմ: Հանրային խորհուրդը մեր պետականության կարեւորագույն օղակներից մեկն է: Դրա համար ես խոսեցի որոշ անձանց մասին:
-Արդյոք այդ որոշ անձինք ստվեր չեն գցում կառույցի հեղինակության վրա:
-Ընդհանրապես, չկա մեր երկրում այնպիսի մի օղակ, որտեղ չլինեն մարդիկ, որ ստվեր չգցեն, բայց դրա մասին չէ, որ ուզում եմ խոսել:
.gif)
