Ինձ ոչ մեկ չի կարա առաջադրի. Էդվին Թադևոսյանը՝ Գագիկ Ծառուկյանի հետ կապի մասին (տեսանյութ)

Հունիսի 7-ին կայանալիք Աբովյանի քաղաքապետի ընտրություններում առաջադրված թեկնածու Էդվին Թադևոսյանը ԲՀԿ նախկին առաջնորդ Գագիկ Ծառուկյանի բարեկամն է՝ մորաքրոջ թոռը: Որոշ տեղեկությունների համաձայն՝ նրանց հարաբերությունները այնքան էլ լավ չեն: Նրա առաջադրումից հետո խոսակցություններ տարածվեցին, թե նրան առաջադրել է Գագիկ Ծառուկյանը, որպեսզի «փոշիացնի» Արթուր Հարությունյանի՝ Պալաչի ձայները:

Այս և այլ հարցերի մասին Armlur.am-ը զրուցեց Էդվին Թադևոսյանի հետ: Նա նաև նշեց, թե Աբովյանում մշտապես վախի մթնոլորտ է տիրել և ինքը նպատակ ունի առաջին հերթին հենց դա վերացնել քաղաքից:

– Պարոն Թադևոսյան, ինչպե՞ս եք գնահատում ձեր շանսերը:

– Հաղթելու ենք, ժողովուրդը մեզ հետ է: Աբովյանցիները փոփոխություն են ուզում, իսկ դա տեսնում են մեզ հետ:

– 28 տարեկանում դեռ վա՞ղ չէ այդքան բեռ Ձեր ուսերի վրա վերցնել:

– 28 տարեկանում շատ բանի եմ հասել: Ես երկար տարիներ աշխատել եմ Վերահսկիչ պալատում, վերջին տարիներին բացահայտ զբաղվում եմ բիզնեսով: Քարոզչության ամբողջ ծախսերը ես եմ հոգում:

– Դուք ասացիք, որ վախի մթնոլորտ է տիրել: Ո՞վ է այդ մթնոլորտը ստեղծել:

– Տարիների ընթացքում է ձևավորվել: Եթե դպրոցներում, մանկապարտեզներում մարդկանց թեկնածուներ են ներկայացնում, ստիպում ընտրել, դա հենց վախի մթնոլորտն է: Բայց հիմա այդ մթնոլորտը չկա, ես առաջադրվել եմ և մեր հաղթանակով ամեն ինչին վերջ կդնենք:

– Երկար տարիներ Աբովյան քաղաքը համարվել է Գագիկ Ծառուկյանի «տարածքը»: Այսինքն՝ նա՞ էլ է վախի մթնոլորտը ստեղծողներից:

– ՀՀ-ում չկան մարզեր կամ տարածքներ, որոնք կոնկրետ որևէ անձին են պատկանում:

– Այդ դեպքում վախի մթնոլորտը ո՞վ է ստեղծել: Միգուցե նախո՞րդ քաղաքապետն էր, այսինքն՝ Կարապետ Գուլոյանը:

– Ընդհանուր մթնոլորտն է, չեմ ուզում անուններ տալ:

– Գագիկ Ծառուկյանը ձեզ սատարու՞մ է:

– Միանշանակ ոչ:

– Իսկ իր հետ շփվու՞մ եք:

– Բնականաբար որպես բարեկամ՝ իհարկե:

– Տարածված լուրեր կան, որ Գագիկ Ծառուկյանն է ձեզ առաջադրել՝ Արթուր Հարությունյանի ձայները փոշիացնելու համար:

– Բոլոր աբովյանցիները, ճանաչելով Էդվին Թադևոսյանին, գիտեն, որ Էդվին Թադևոսյանն ինքնուրույն մարդ է: Էդվին Թադևոսյանին ոչ մեկ չի կարա առաջադրի:

– Ձեզ հիմնական մրցակից ո՞ւմ եք համարում:

– Անուններ չտամ: Մի թեկնածու կա, որի հետ հարաբերություններ կա և ում ազնիվ մարդ եմ համարում՝ Արթուր Հարությունյանը:

– Ո՞ր Արթուր Հարությունյանը (նշենք, որ նույն անուն ազգանունով երկու թեկնածու կա):

– Իրական Արթուր Հարությունյանը:

– Այսինքն՝ մյուսը կե՞ղծ է:

– Դե բնականաբար, եթե մարդուն ոչ մեկ չի ճանաչում: Ոչ շտաբ ունի, բնականաբար բոլորը գիտեն, ժողովուրդն էլ խոսում է:

– Նրա՞ն են բերել Արթուր Հարությունյանի ձայները փոշիացնելու համար, ոչ թե ձեզ: 

– Պրովակացիոն հարցեր եք տալիս: Բերողներին պետք է հարցնել: Ես չգիտեմ, թե ով է բերողը:

Հավելենք, որ Էդվին Թադևոսյանի նախընտրական շտաբը գտնվում էր «Ամրոց» կոչվող ռեստորանային համալիր հիշեցնող շենքում, որը, ըստ տեղեկությունների, պատկանում է հենց իրեն: Թադևոսյանը, սակայն այդպես էլ չասաց, թե դա ինչ հաստատություն է: Նշենք նաև, որ անկուսակցական թեկնածուն զբաղվում է սպասարկման և առևտրի բիզնեսներով:

Նաիրա Հովհաննիսյան