Այսօր կայացած ասուլիսի ընթացքում Հայաստանի արտաքին գործերի նախարար Էդվարդ Նալբանդյանն անդրադարձավ Ադրբեջանի արտաքին գործերի նախարար Էլմար Մամեդյարովի այն հայտարարությանը, թե վերջինս Լեռնային Ղարաբաղի հակամարտության առաջընթացի հույսեր ունի:
Մամեդյարովը նշել էր, թե հույսեր է կապում ԵԱՀԿ գործող նախագահի՝ տարածաշրջան կատարած այցի հետ: Անդրադառնալով այս հայտարարություններին` Նալբանդյանը նշեց. «Մինչ այսօր Ադրբեջանը բավական ապակառուցողական և անիրատես դրսևորում էր ցուցաբերում ԼՂՀ հարցի վերաբերյալ: Վերջին անգամ դա եղավ Արևելյան գործընկերության գագաթնաժողովին: Ներկա բոլոր երկրները միակարծիք էին ԼՂՀ հարցի վերաբերյալ, միայն Ադրբեջանն էր, որ այլ կարծիք ուներ: Եթե իրենք մտադիր են այսուհետ փոխվել ու այլ դիրքորոշում դրսևորել, այո, ինչո՞ւ ոչ, կապրենք կտեսնենք»։
Այս նույն հարցի հետ կապված ԵԱՀԿ գործող նախագահ Իվիցա Դաչիչը նշեց. «Ադրբեջանն ունի ինչ-որ գաղափարներ, որոնք ներկայացվել են ինձ՝ Մինսկի խմբի համանախագահների կազմի ընդլայնման վերաբերյալ: Դա նոր առաջարկ չէ, բայց նման առաջարկի համար պետք է կոնսենսուս լինի: Մինսկի խումբը պետք է աշխատի իր ձևաչափով: Մենք պետք է ուժեղացնենք խաղաղությունը, ամրապնդենք կայունությունը»:
.gif)
