Կառավարության նիստի սկզբում գյուղատնտեսության նախարար Սերգո Կարապետյանը վարչապետ Հովիկ Աբրահամյանի հրամանով ներկայացրեց, թե վերջին օրերին տեղացած կարկուտներն ինչ վնասներ են պատճառել:
Նախարարը նախ նշեց, որ մեր երկրում կարկուտները տեղում են ապրիլից մինչև օգոստոս ընկած ժամանակահատվածում, իսկ ավելի ինտենսիվ` ապրիլի առաջին կեսից հետո մինչև հուլիս ընկած ժամանակահատվածում:
«Այս տարի հիմնականում վնասվել են 1400 հա բազմամյա տնկիները` ծիրանենիները և խաղողի այգիները: Բոլոր մարզերում ստեղծված են կենտրոններ, որտեղ կան համապատասխան մասնագետներ և ճշգրտվում են տվյալները: Իրական տվյալները պարզ կլինեն մի քանի օր հետո: Ամեն տարի հակակարկտային կայանների քանակն ավելացնում ենք, սակայն դրանց արդյունավետությունը կազմում է 60-75 տոկոս», – նշեց նա:
Նախարարի խոսքով, այս կայանները եվրոպական երկրներում այլևս չեն օգտագործվում, այլ կարկուտից պաշտպանվելու համար օգտագործվում է ցանցային տարբերևակը: Նախարարը հավելեց, որ այս տարին բարենպաստ է գյուղատնտեսության համար:
.gif)
