ՀԱՐՑ. Ամեն ինչ կենտրոնացել է Երեւանում: Բժշկությունը նույնպես: Շրջաններում մնացածը հիվանդանոց հիշեցնող կառույցներ են՝ համեմատաբար ավելի թույլ բուժանձնակազմով: Հիվանդը շատ անգամ մարզկենտրոնների հիվանդանոցներում անբուժելի է դառնում մինչ Երեւան հասնելը: Ի՞նչ է արվում մարզային բուժհաստատությունների զարգացման ուղղությամբ:
ՊԱՏԱՍԽԱՆ. ՀՀ առողջապահության համակարգի զարգացման ծրագրի շրջանակներում հիվանդանոցային օղակներում 2009թ. դեկտեմբերից մինչեւ 2012թ. սեպտեմբեր ընկած ժամանակահատվածում հիմնանորոգվել եւ կառուցվել են Արարատի, Արմավիրի, Ապարանի, Գավառի, Գորիսի, Իջեւանի, Հրազդանի եւ Գյումրու բժշկական կենտրոնները: Դրանք հագեցվել են արդի, միջազգային չափանիշներին համապատասխանող բժշկական սարքավորումներով, կահույքով եւ պարագաներով:
Մարզային առողջապահական համակարգի հետագա զարգացման նպատակով առաջիկայում կկառուցվի Սյունիքի մարզի Մեղրու տարածաշրջանային բժշկական նոր շենքը, եւ կվերանորոգվեն Կապանի բժշկական կենտրոնի մասնաշենքերը: Կարդիականացվեն նաեւ Լոռու մարզի Ալավերդու, Կոտայքի մարզի Աբովյանի եւ Տավուշի մարզի Բերդի բ/կ-ները, Վանաձոր քաղաքում կկառուցվի նոր, երրորդային մակարդակի բազմաֆունկցիոնալ բժշկական կենտրոն:
աշխատակազմի ղեկավարի տեղակալի
պաշտոնակատար Մարինե Հայրապետյան
«ԺՈՂՈՎՈՒՐԴ». Եթե հետեւելու լինենք ՀՀ առողջապահության նախարարության տրամադրած ցուցանիշներին, ապա շատ մոտ ապագայում Հայաստանի գրեթե բոլոր մարզերում կլինեն ժամանակակից բազմաֆունկցիոնալ հիվանդանոցներ: Բայց, ցավոք, փորձը ցույց է տալիս, որ շատ ծրագրեր այդպես էլ մնում են թղթի վրա կամ լավագույն դեպքում իրագործվում թերացումներով: Հուսանք՝ մարդկանց առողջությանը վերաբերող այս կարեւորագույն ոլորտը չի նմանվի մյուսներին:
.gif)
