«Այս հուշաքարն իմ եղբոր ապրած կյանքն է». Եռաբլուրում հարգեցին Սմբատ Այվազյանի հիշատակը (տեսանյութ)

Այսօր Եռաբլուր զինվորական պանթեոնում տեղի ունեցավ «Տիգրան Մեծ» աշխարհազորային գնդի հրամանատար, ազատամարտիկ, ԱԺ առաջին գումարման պատգամավոր վաղամեռիկ Սմբատ Այվազյանի հուշաքարի բացման արարողությունը: Բացման արարողությանը ներկա էին վարչապետ Հովիկ Աբրահամյանը, առաջին նախագահ Լևոն Տեր Պետրոսյանը, ԱԺ պատգամավորներ, Սմբատ Այվազյանի ընտանիքի անդամներ, հարազատներ, ընկերներ:

Ամբատ Այվազյանի եղբայրը` Սեյրան Այվազյանը մի կերպ արցունքները զսպելով ասաց` այս հուշաքարն իր եղբոր ապրած կյանքն է պատերազմի տարիներից սկսած:

Ներկաներից սպարապետ Վազգեն Սարգսյանի եղբայր Արամ Սարգսյանն ասաց` ինքը բոլոր առումներով զգում է Սմբատ Այվազյանի կարիքը: «Շատ ափսոս, որ նա այսօր մեզ հետ չէ: շատ ծանր ճանապարհ ենք անցել միասին: Աննակարագրելի պայքարող մարդ էր»,- ասաց սպարապետի եղբայրը:

Սմբատ Այվազյանի մտերիմ ընկեր ԱԺ ՀՀԿ խմբակցության պատգամավոր Վահրամ Բաղդասարյանն էլ Armlur.am-ի հետ զրույցում ասաց.«Հայրենիքի համար այն, ինչ կատարել է նա, ուսուցանելի է բոլորի համար»:

Սմբատ Այվազյանը մահացել է 2014 թվականի հունիսի 8-ին 55 տարեկան հասակում ծանր եւ երկարատեւ հիվանդությունից հետո Փարիզի հիվանդանոցներից մեկում:

Մանրամասները` Armlur.am-ի տեսանյութում

Քրիստինա Աղալարյան, Տիգրան Սարգսյան