ՀՀ-ում ցանկացած ընտրության արդյունք չի կարող արժանահավատ լինել

Այս կիրակի Հայաստանի մի շարք համայնքներում տեղի ունեցած տեղական ինքնակառավարման մարմինների ընտրությունները եւս մեկ անգամ ապացուցեցին, որ քանի դեռ ընտրացուցակների վիճակը չի կարգավորվել, ՀՀ-ում ցանկացած ընտրության արդյունք չի կարող արժանահավատ լինել: «Ժողովուրդ»-ը փոքրիկ համեմատությամբ ուշագրավ իրողություն բացահայտեց: Օրինակ՝ Աբովյան քաղաքը, ըստ ԿԸՀ-ի ներկայացրած ընտրացուցակների, ունի 43 հզ. 800 ընտրող, մինչդեռ ընդհանուր բնակչությունը, ըստ պաշտոնական տվյալների, 44 հզ. 300 է: Արտաշատում ընտրացուցակներով ընտրողների թիվը 21 հզ. է, իսկ բնակչության պաշտոնական թիվը` 21 հզ. 300: Այսինքն՝ ստացվում է, որ Աբովյանում եւ Արտաշատում ողջ բնակչությունը ընտրողներ են, այդ քաղաքներում մինչեւ տասնութ տարեկան երեխա գրեթե չկա: Իսկ Ալավերդի քաղաքի դեպքում իրավիճակն ավելի խայտառակ է, այստեղ ընտրողների թիվը մի 3 հազարով ավել է բնակչության պաշտոնական թվից: Ալավերդին պաշտոնական տվյալներով ունի 13 հզ. 700 բնակիչ, ընտրողների թիվը կազմել է 16 հզ. 474: Իսկ թե քանի հանգուցյալ կա ցուցակներում, դժվար չէ կռահել:

 
«Հայաստանի էլեկտրական ցանցեր» ընկերության գլխավոր տնօրեն Եվգենի Բիբինի՝ ԱԺ այցելությունից եւ ՀՀԿ խմբակցության անդամների հետ հանդիպումից մոտ մեկ շաբաթ է անցել, բայց իշխող կուսակցության ներկայացուցիչները դեռ չեն կարողանում զսպել նրա հանդեպ իրենց տածած զայրույթը: Մասնավորապես, ԱԺ ՀՀԿ խմբակցության անդամ Մանվել Բադեյանը «Ժողովուրդ»-ի հետ զրույցում ասաց. «Ինձ թվում է, որ Բիբինը անպայման պետք է պատժվի, հենց չհիմնավորված, ակնհայտորեն չհիմնավորված ծախսեր ներկայացնելու փաստի համար միայն: Որպես պերսոնա պետք է պատժվի»: Այն, որ ՀՀԿ-ականներին զայրացրել է ՀԷՑ-ի էլէներգիան թանկացնելու վերաբերյալ հայտը, այդքան էլ արժանահավատ չէ ու չէ հենց այն պատճառով, որ ՀԷՑ-ի կողմից նախորդ տարիներին ներկայացրած հայտերն էլ հիմնավորված չեն եղել: ՀՀԿ-ականների այս զայրույթի իրական պատճառը, թերեւս, այն է, որ իրենց հետ հանդիպման ժամանակ Բիբինն իրեն պահել է տանտիրոջ, կամ ավելի ճիշտ, գաղութատիրոջ պես, ինչը խոցել է իշխանական պատգամավորների արժանապատվությունը:

 
«Ժողովուրդ»-ի տեղեկություններով՝ Գյումրիում ոճրագործության զոհ դարձած Ավետիսյանների ընտանիքի սպանության գործով ՀՀ գլխավոր դատախազությունը ակտիվ գրագրության մեջ է Ռուսաստանի Դաշնության գլխավոր դատախազության հետ: Սակայն ողջ գրագրությունը հրահանգված է գաղտնի պահել, եւ այժմ հայտնի չէ, թե դրանց արդյունքում կողմերն ինչ պայմանավորվածության են հանգել: Հիշեցնենք՝ ի սկզբանե ենթադրվում էր, որ ՀՀ գլխավոր դատախազությունը պետք է կարողանա հասնել նրան, որպեսզի Ավետիսյանների ընտանիքի սպանության մեջ մեղադրվող, Գյումրում գտնվող ռուսական 102 ռազմաբազայի զինծառայող Վալերի Պերմյակովը հանձնվի ՀՀ իրավապահներին: Հետագայում պարզվեց, որ ՀՀ գլխավոր դատախազությունը ռուսական կողմից քրեական գործի նյութերն էր պահանջել ընդամենը: Այս պահին, սակայն, հայտնի չէ նաեւ՝ արդյո՞ք Պերմյակովի դատի ժամանակ, որն, ինչպես մի քանի անգամ հայտարարել է ռուսական կողմը, տեղի է ունենալու ՌԴ դատարանում, Հայաստանի դատախազությունը կկարողանա մեղադրանք ներկայացնել, թե՞ ոչ:

ԱՊԱԵՎՐՈՊԱՑՈՒՄ

Հունիսի 12-ին իր հարկի տակ առաջին Եվրոպական խաղերն անցկացնող Ադրբեջանը հետզհետե ավելի ու ավելի է հեռանում Եվրոպայից եւ դեռ խորհրդային տարիներից հայտնի իր «լայն քայլերով» գնում դեպի Ռուսաստանի գիրկը: Անցած շաբաթ այդ երկրում ԵԱՀԿ-ի գրասենյակի համակարգողի` ադրբեջանական ծագմամբ ֆրանսիացի դիվանագետ Ա. Շահթաթինսկու սկանդալային պաշտոնանկությունից հետո պաշտոնական Բաքուն հայտարարեց այդ երկրում ԵԱՀԿ գրասենյակի փակման մասին: «Ազատության» փոխանցմամբ` նման պահանջով դիվանագիտական նոտան արդեն իսկ ուղարկվել է ԵԱՀԿ-ի Վիեննայի կենտրոնակայան: Բաքուն մեկ ամիս ժամանակ է տրամադրել ԵԱՀԿ-ին Ադրբեջանի մայրաքաղաքում աշխատանքն ավարտելու համար` այդպես էլ չներկայացնելով նման որոշում կայացնելու պատճառը:
Նկատենք, որ հատկապես վերջին շրջանում Բաքվում մարդու իրավունքների ոտնահարման աղաղակող դեպքերի առնչությամբ առավել հաճախ եւ կոշտ ձեւակերպումներով հնչող եվրոպական քննադատությանը Ալիեւի վարչակազմն արձագանքում է ոչ պակաս կոշտությամբ: Մասնավորապես` ԵԱՀԿ գրասենյակի փակման այս որոշումն էլ հենց Ադրբեջանի հասցեին այդ կառույցի տարբեր պաշտոնյաների կողմից հնչեցված քննադատության պատասխանն էր: Հիշեցնենք, որ Բաքվում ԵԱՀԿ-ի գրասենյակի ծրագրերի համակարգողին պաշտոնանկ էին արել այն բանի համար, որ նա չափազանց սերտ հարաբերություններ ուներ Ալիեւի եւ Մամեդյարովի հետ, որոնց հետ հրապարակած լուսանկարները հատուկ քննարկման առարկա էին դարձել ԵԱՀԿ կենտրոնակայանում: Բացի այդ` մայիսի 21-ին Ռիգայի գագաթնաժողովի շրջանակներում կազմակերպված մեդիա-ֆորումի ընթացքում ԵԱՀԿ մամուլի ազատության հարցերով ներկայացուցիչ Դունյա Միյատովիչը ուղիղ տեքստով կոչ արեց դադարեցնել համագործակցությունը այնպիսի երկրի հետ, ինչպիսին Ադրբեջանն է, որտեղ պարբերաբար լրագրողներ են ձերբակալվում: Դե, իսկ Ռիգայի գագաթնաժողովի ընդունած հռչակագրում Ղարաբաղի հետ կապված ձեւակերպումների շուրջ անհամաձայնության արդյունքում Ադրբեջանի արտգործնախարարի դեմարշից հետո եվրոպաշտոնյաների հնչեցրած գնահատականները` ոչ խելամիտ, անհավասարակշիռ, եւ այլն, առավել տեսանելի դարձրին խորացող խզումը:
Մի կողմից սա, իհարկե, ուրախալի է այն իմաստով, որ Եվրոպայում գուցե վերջապես կհասկանան, որ Հայաստանն ու Ադրբեջանը պետք չէ դիտարկել նույն հարթությունում: Մյուս կողմից, սակայն, դա մեզ ոչինչ չի տա, քանի որ Եվրոպայից վանվող Ադրբեջանը առավել ակտիվ քայլեր կանի հակառակ բեւեռին` Ռուսաստանին առավել սերտորեն մոտենալու համար, իսկ դա, բնականաբար, տեղի կունենա հայ-ռուսական դաշնակցային հարաբերությունների եւ առաջին հերթին` Հայաստանի շահերի հաշվին: