Ես չեմ պատժում, ես կատարում եմ իմ աշխատանքը. Արմեն Երիցյանը՝ գազալցակայանում անցկացվող ստուգումների մասին

ՀՀ տարածքային կառավարման եւ արտակարգ իրավիճակների նախարար Արմեն Երիցյանն օրեր առաջ խորհրդակցության ժամանակ հայտարարել էր, որ իրենց կողմից իրականացված ստուգումների արդյունքում Երեւանում տուգանվել է 11 գազալցակայան: Նախարարը շեշտել էր, որ ստուգումները շարունակվելու են հանրապետության բոլոր մարզերում եւ հորդորել միայն տուգանքներով չսահմանափակվել, խստացված ռեժիմով ստուգումները շարունակել՝ վերահսկողության տակ պահելով նաեւ շարժական գազալցակայանները:

«Ժողովուրդ»-ը զրուցել է ՀՀ տարածքային կառավարման եւ արտակարգ իրավիճակների նախարար Արմեն Երիցյանի հետ՝ պարզելու համար, թե ինչպես է նախարարը պատկերացնում իր հետագա աշխատանքը գազալցակայանների անվտանգության ապահովման ուղղությամբ:

-Պարո՛ն Երիցյան, Ձեր ղեկավարած գերատեսչությունը գազալցակայանների անվտանգության խնդրով սկսեց առավել ակտիվ զբաղվել միայն այն ժամանակ, երբ մեկը մյուսի հետեւից տեղի ունեցան ողբերգական դեպքեր` մարդկային զոհերով: Ինչո՞ւ մինչ այդ ՏԿԱԻՆ-ը չէր զբաղվում իրեն լիազորված աշխատանքներով, ինչո՞ւ եք նոր որոշել նման գործունեություն իրականացնել:

-Դուք շատ սխալ տեղեկություններ ունեք մեր վարած աշխատանքի վերաբերյալ, որովհետեւ իրականում մենք մշտապես էլ աշխատել ենք, ու մշտապես էլ մեր հսկողությունը եղել է: Ուղղակի վերջին դեպքերից հետո ավելի ակտիվորեն սկսվեց քննարկվել այդ հարցը ու այն աշխատանքները, որոնք մենք կատարում էինք, բայց չէր լուսաբանվում, դրա մասին արդեն սկսեցին բարձրաձայնել: Ես Ձեզ վստահեցնում եմ, որ այդ հարցում մեր աշխատանքները մշտական ու շարունակական են եղել: Բոլոր գազալցակայանները տարին մեկ անգամ պետք է փորձաքննություն անցնեն, դրանից ավել մենք անելիք չունենք ու դրա իրավունքն էլ չունենք: Մենք չենք կարող ամեն օր գնալ գազալցակայաններ ու սկսել ստուգումներ իրականացնել, եթե մենք գնանք, մեզ կգան, կասեն՝ ինչու եք ամեն օր գալիս: Մարդն իր բիզնեսով է զբաղվում, ես իրավուքն չունեմ անընդհատ հսկել նրա աշխատանքը, մեր ֆունկցիան է՝ տարին մեկ անգամ ստուգումներ իրականացնել, որը մենք պարտադիր անում ենք:

-Այդ դեպքում ինչո՞ւ եք հիմա նորից ստուգումներ իրականացնում, ի՞նչ խնդիրներ են առկա այդ ոլորտում, որոնք չի հաջողվում լուծել՝ ողբերգական դեպքերից խուսափելու համար:

-Իսկապես այդ հարցում մի սպեցեֆիկա կա, գազալցակայանների թիվն ավելացել է, ու խնդիր է առաջացել վաճառքի հետ կապված, ինչի համար էլ գազալցակայանների սեփականատերերը փորձում են իրենց հնարքների միջոցով հաճախորդներ ավելացնել: Իսկ դա անում են անվտանգության հաշվին. նախատեսված չափից շատ են լիցքավորում: Կա նաեւ անորակ գազալցակայանների հարցը, դրանց սեփականատերերը չեն օգտվում այն անհրաժեշտ սարքավորումներից, որոնք նախատեսված են օրենքով: Մենք բազմիցս ենք բարձրաձայնել այդ մասին, ներկայացրել ենք իրողությունը, ուղղակի չեմ կարողանում հասկանալ, թե ինչու է դա Ձեզ համար նորություն:

-Բայց ողբերգական դեպքերի գրանցումից հետո պատկան մարմինները սկսեցին ուսումնասիրել այն խնդիրները, որոնք տարիներ ի վեր առկա էին գազալցակայաններում, ու միայն հիմա տուգանքներ նշանակե՞լ: Մի՞թե դա բավարար է, որպեսզի հաջորդ անգամ նման դեպքերը չկրկնվեն: Անպայման պետք է լիներ ՀՀ վարչապետ Հովիկ Աբրահամյանի հանձնարարակա՞նը, որպեսզի սկսեիք ավելի լուրջ վերաբերվել հարցին:

-Ես արդեն բացատրեցի, որ մենք մշտապես էլ գազալցակայանների խնդիրը մեր ուշադրության կենտրոնում ենք պահել, մենք մշտապես կատարել ենք մեզ վերաբերող գործառույթները: ՀՀ վարչապետի հանձնարարականից հետո մենք սկսկել ենք նորից ստուգումներ իրականացնել, բայց տարին մեկ անգամ փորձաքննություն է արվում: Չգիտեմ, որտեղից եք վերցնում, որ մինչ այդ մենք որեւէ աշխատանք չենք իրականացրել այդ ոլորտում: Մենք կարող ենք փաստաթղթերով խոսել, որտեղ կներկայացվի այն տուգանքների չափը, որը մեր գերատեսչությունը սահմանել է գազալցակայանների ստուգումների իրականացման ժամանակ:

-Հայտնի իրողություն է, որ գազալցակայանները պատկանում են այնպիսի մարդկանց, որոնք սերտ կապեր ունեն Սերժ Սարգսյանի հետ, արդյո՞ք Ձեզ կհաջողվի նրանց «պատժել»:

-Ես չեմ պատժում, ես կատարում եմ իմ աշխատանքը ու ՀՀ վարչապետի հանձնարարականը, կարծում եմ՝ բոլորն էլ շատ լավ տեղյակ են, որ ես Ձեր նշած պատժիչ գործառույթը չեմ իրականացնում: Դա իմ աշխատանքի մեջ ներառված չէ:

-Նույն խնդիրն առկա է նաեւ վերելակների հարցում, ինչո՞ւ այդ դաշտում եւս պատշաճ վերահսկողություն չի իրականացվում, ինչի արդյունքում դարձյալ գրանցվում են մարդկային զոհերով ողբերգական դեպքեր:

-Դուք սխալ տեղեկություն ունեք, մենք կրկին ստուգումներ ենք իրականացնում, բայց մեզ պետք է դիմեն համայնքներից, որպեսզի մենք իրավունք ունենանք այդ ստուգումներն իրականացնել: Ասեմ Ձեզ՝ շատ հեշտ է ինչ-որ գնահատականներ հնչեցնել, քննադատել, բայց դա միայն մեր գերատեսչությանը չի վերաբերում, շատ խնդիրներ կան, որոնք պետք է հերթով իրականացնել: Իսկ ինչը վերաբերում է մեզ, դա մենք կատարում ենք: Ես կարծում եմ՝ իմ ղեկավարման տարիներին կարողացել եմ ապացուցել, որ այն, ինչը վերաբերում է իմ գերատեսչությանը, մենք աշխատում ենք դա կատարել բարեխղճորեն:

Զրուցեց ՍՈՆԱ ԳՐԻԳՈՐՅԱՆԸ