Օր օրի ավելի անհասկանալի է դառնում, թե, ի վերջո, Հայաստանն ինչ դիրքորոշում ունի ԵվրԱզԷսի եւ մաքսային ընդհանուր միության մասով: “Ժողովուրդ”-ը զրուցեց տարբեր կուսակցությունների ներկայացուցիչների հետ՝ պարզելու՝ ինչ որոշում պետք է կայացնի Հայաստանը՝ դեպի Ռուսաստա՞ն գնա, թե՞ արեւմուտք:
“Նոր ժամանակներ” կուսակցության նախագահ ԱՐԱՄ ԿԱՐԱՊԵՏՅԱՆ
-Պարո՛ն Կարապետյան, լուրեր են շրջանառվում, որ ՌԴ նախագահ Վլադիմիր Պուտինի կողմից ճնշումներ են գործադրվում Սերժ Սարգսյանի վրա, որպեսզի Հայաստանը ԵվրԱզԷս-ի դիտորդ անդամից ընդգրկվի այդ կազմի մեջ:
-Ես ինչքան գիտեմ, նման հարցի շուրջ ճնշում գոյություն չունի: Այսօր մենք ԵվրԱզԷս-ի դիտորդ անդամ ենք, որեւէ խնդիր չկա, այնտեղ, եթե չեմ սխալվում, 4 դիտորդ անդամ կա: Հիմա խոսքը վերաբերում է Մաքսային ընդհանուր միությանը, որն ապահովում է տնտեսական տարածք, ազատ առեւտրի գոտի, եւ այդ պայմանների տակ ստորագրել ու մտել ենք 7 պետությունների հետ: Այս հարցերում, կարծում եմ, ոչ թե ճնշում, այլ ինտեգրացիայի շարունակության, առաջընթացի ձեւեր են ցույց տրվում, որովհետեւ եթե Հայաստանը ինտեգրվի, իմ տեսանկյունից, շատ մեծ տնտեսական օգուտներ կարող է ունենալ: Կարծում եմ՝ ռուսական իմ կոլեգաները սա են ներկայացնում Սերժ Սարգսյանին:
-Սերժ Սարգսյանի ու վարչապետ Տիգրան Սարգսյանի տեսակետներն այս հարցում կարծես տարբեր են: Երկուսն էլ իրենց ելույթներում տարբեր տեսակետներ են հայտնում:
-Ես իմ տպավորությունն ասեմ. ընտրվել է մի տարբերակ, որ մենք այդքան էլ դեմ չենք, բայց հասարակության որոշակի մի զանգվածն է դեմ: Ես դա քաղաքականություն չեմ համարում, այլ ընդամենը ինտրիգ: Ու չգիտեմ՝ ինչ են անում իրենք, որովհետեւ քաղաքականության մեջ կողմնորոշումները պետք է հստակ լինեն, քանի որ գնալով վիճակն էլ ավելի է բարդանում: Կարծում եմ՝ ամեն ինչ պետք է անել ռացիոնալ, եթե հասկանում ենք, որ դա մեզ համար շահավետ է, ուրեմն մենք պետք է մասնակցենք առանց ինտրիգների: Ես հիմա ՀՀ անվտանգությունն առաջին տեղում կդնեի, իսկ երկրորդը՝ ՀՀ տնտեսությունը: Այս երկու հարցերն ինձ համար գրեթե հավասար են:
ՀԱԿ անդամ ՎԼԱԴԻՄԻՐ ԿԱՐԱՊԵՏՅԱՆ
-Պարո՛ն Կարապետյան, Հայաստանը, ըստ Ձեզ, ի՞նչ դիրքորոշում պետք է որդեգրի՝ դեպի ԵվրԱզԷ՞ս, թե՞ Եվրամիություն:
-Անկախ պետությունը պետք է հետապնդի իր շահերը եւ պետք է կարողանա դիմագրավել ցանկացած ավելի անկախ, ուժեղ պետությանը: Ճնշում գործադրելն անհնարին է: Ես հուսով եմ, որ որեւէ մեկը չի հանդգնի որեւէ ճնշում գործադրել: Իսկ ինչ վերաբերում է Եվրամիությանը, ապա կարող եմ ասել, որ դա ժողովրդի ընտրությունն է: Եվրոպական արժեքների որդեգրումը մեր պետության անշեղ զարգացման ուղին է, որը չի բացառում ՌԴ-ի հետ ավելի սերտ, ավելի խորը համագործակցությունը:
ԱԺ ՀՅԴ խմբակցության անդամ ԱՐԾՎԻԿ ՄԻՆԱՍՅԱՆ
-Պարո՛ն Մինասյան, այսօր Հայաստանը կանգնել է բարդ խնդրի առաջ՝ ընտրել ԵվրԱզԷ՞ս-ը, թե՞ Եվրամիությունը: Ըստ Ձեզ՝ ինչպե՞ս պետք է մեր երկիրն այս իրավիճակից “պատվով” դուրս գա:
-Եվրոպական եւ Եվրասիական միության շրջանակներում ինտեգրումը տարբեր ժամանակահատվածներում է ի հայտ եկել: Ակնհայտ է, որ Եվրասիական ուղղվածությունը, որը նախաձեռնվել է հիմնականում ՌԴ-ի կողմից, առաջարկում է ինչ-որ փուլում այլընտրանքային քաղաքականության որդեգրում: Սակայն այդ ինչ-որ փուլը դեռ չի եկել, դեռ ժամանակահատված կա: Գալու է այն պահը, երբ հստակ սահմանազատում պետք է դրվի՝ Եվրասիակա՞ն, թե՞ Եվրամիություն:
-Տիգրան եւ Սերժ Սարգսյանների ելույթներից անհասկանալի է, թե նրանք որին են հակված:
-Անկեղծ ասած, ես ԱԺ-ում այդ հարցն ուղղել եմ վարչապետին, նա պատասխանել է, թե իրենք հիմա ակտիվորեն աշխատում են Եվրասիական ուղղության շրջանակներում, սակայն որեւէ հստակ պատկերացում եւ որոշում այս պահին չկա: Ես կարծում եմ, որ երկու գործընթացների իրականացումը հնարավոր է, բայց ինչ-որ մի փուլի՝ մաքսային, միասնական տարածք ունենալու հարցում պետք է որոշում կայացվի: Ինտեգրացման գործընթացում չպետք է մի ուղղությունն ավելի շատ խորանա, իսկ մի ուղղությունը մնա մակերեսային վիճակում: Մենք պետք է հստակ ձեւակերպենք մեր պահանջները:
ԱԺ ԲՀԿ խմբակցության անդամ ՏԻԳՐԱՆ ՈՒՐԻԽԱՆՅԱՆ
-Պարո՛ն Ուրիխանյան, ԲՀԿ-ն ինչպե՞ս է տեսնում հարցի լուծումը՝ Ռուսաստա՞ն, թե՞ արեւմուտք:
-ԲՀԿ-ն ոչ մի կողմ միտված չէ, բացի ՀՀ պետականության եւ ժողովրդի շահը, այսինքն՝ ԲՀԿ-ն միտված է դեպի ժողովրդի շահը:
ՍՈՆԱ ԳՐԻԳՈՐՅԱՆ
.gif)
