Օգոստոսի 17-ի իր համարում «Ժողովուրդ» օրաթերթը գրել էր, որ ճանապարհային ոստիկանության նախկին պետ Մարգար Օհանյանը պատրաստվում է ներման դիմում գրել Սերժ Սարգսյանին: Մարգար Օհանյանի եղբայր Մուշեղ Օհանյանն էլ հաստատել էր տեղեկությունը, թե ներման դիմումն արդեն գրվել է: Թեեւ ՀՀ ՃՈ նախկին պետի եղբայրը վստահաբար հայտնում է, որ ներման դիմումը գրվել է, այնուամենայնիվ, նրա պաշտպան Մկրտիչ Վասակյանը խուսափում է պատասխանել: «Ես չգիտեմ՝ գրվել է ներման դիմում, թե ոչ, ու ոչինչ ասել չեմ կարող այդ մասին»,-«Ժողովուրդ»-ի հետ զրույցում նշել էր պաշտպանը:
Ինչեւէ, ստեղծված իրավիճակի շուրջ զրուցեցինք Մուշեղ Օհանյանի հետ՝ հասկանալու, թե, ի վերջո, ինչ սպասելիքներ կան Սերժ Սարգսյանից:
-Պարո՛ն Օհանյան, Դուք ասում եք, որ ներման դիմում գրվել է Սերժ Սարգսյանին, իսկ Ձեր եղբոր պաշտպանը նշում է, թե տեղյակ չէ: Ուզում ենք հասկանալ՝ ի վերջո, դիմում գրվե՞լ է, թե՞ ոչ:
-Դիմում իսկապես գրվել է, եւ մենք սպասում ենք:
-Հաշվե՞լ եք՝ ինչքան ժամանակ է անցել դիմումը ներկայացնելուց մինչ այսօր:
-Երկու ամսից ավելի է, ինչ ներկայացրել են Սերժ Սարգսյանին:
-Իսկ ինչպե՞ս կբացատրեք երկամսյա այս լռությունը:
-Չեմ կարող բացատրել, դեռ սպասում ենք:
-Միգուցե Սերժ Սարգսյանի այս լռությունը չներելու նրա մտադրությո՞ւնն է:
-Ես կարծում եմ, որ կների:
-Իսկ եթե հակառակը լինի, եւ չների՞:
-Իմ հույսը դրական պատասխանն է:
-Ձեր եղբորը վերջին անգամ ե՞րբ եք տեսել:
-Այդ հարցին չեմ ուզում պատասխանել:
-Ինչո՞ւ:
-Դե չեմ ուզում:
-Վերջին անգամ Ձեր հարցազրույցներից մեկում նշել էիք, թե նա առողջական խնդիրներ ունի: Տեղյա՞կ եք, թե հիմա ինչպես է:
-Ճիշտ է, ունի առողջական խնդիրներ, բայց ոչ մի լուրջ բան չկա, եւ ամեն ինչ լավ է:
-Մինչ նախագահական ընտրությունները Ձեր եղբորն ազատ կարձակե՞ն:
-Ես կարծում եմ՝ ավելի շուտ կլինի:
-Հստակ օր գիտե՞ք:
-Ոչինչ չեմ կարող ասել: Ես ամեն օր էլ սպասում եմ:
.gif)
