Օրերս Երեւանի պետական համալսարանի պատմության ֆակուլտետի դեկան Էդիկ Մինասյանի եւ ակտիվ երիտասարդներից բաղկացած «Հակահարված» կոչվող խմբի միջեւ բախում տեղի ունեցավ, որը մի նոր աղմկոտ բացահայտման առիթ դարձավ: Խոսքը ԵՊՀ պատմության ֆակուլտետում օգտագործվող դասագրքերից մեկի մասին է, որտեղ հիշատակվում են 2008թ. մարտի 1-ին նախորդող եւ հաջորդող իրադարձությունները՝ գլխիվայր շրջված նկարագրություններով: Այս առիթով «Ժողովուրդ»-ը զրուցեց մարտի 1-ի 10 զոհերից մեկի՝ Տիգրան Խաչատրյանի մոր՝ Ալլա Հովհաննիսյանի հետ:
-Տիկի՛ն Հովհաննիսյան, ինչպե՞ս եք վերաբերում այս ամենին, երբ մարտի 1-ի իրադարձությունների փաստերը խեղաթյուրվել են:
-Երբ այս մասին իմացա, ողջ գիշեր չքնեցի: Իշխանության ներկայացրած փաստերից բացի, այդ դասագիրքն ավելի մեծ սուտ է պարունակում իր մեջ. այնտեղ գրել են, թե «երկուստեք հրազեն» են օգտագործել: Ախր ոստիկանության, հատուկ քննչական ծառայության հաշվետվություններում «երկուստեք հրաձգության» մասին անգամ բառ չկա: Կարելի՞ է այդպես խեղաթյուրել պատմությունը: Ուղղակի իրենք այնպիսի մի բան են արել, որ Բաղրամյան 26-ին դուր գան: Բայց ինչպե՞ս կարելի է խեղաթյուրված պատմություն ներկայացնել սերունդներին:
-Ի՞նչ եք պատրաստվում անել:
-Կարծում եմ՝ մենք բոլոր ծնողների հետ պետք է քննարկենք եւ դատի տանք, որպեսզի թույլ չտանք այդ դասագրքով շարունակեն դասավանդել: Վաղը զոհերի ծնողներով կհանդիպենք, որովհետեւ ԱԺ-ում էլ ցանկանում են մարտի 1-ի գործով ժամանակավոր հանձնաժողով ստեղծել, դրա հետ միասին այս հարցն էլ կքննարկենք: Կխորհրդակցենք փաստաբանների հետ:
-Հաշվի առնելով մեր դատական համակարգում տիրող բարքերը՝ ի՞նչ եք կարծում, լուծում կտա՞ն խնդրին:
-Ոչինչ: Կանցնենք մեր ատյանները, հետո կդիմենք Մարդու իրավունքների եվրոպական դատարան:
-Փորձե՞լ եք զրուցել գրքի հեղինակի հետ կամ կապ հաստատել ԵՊՀ ղեկավարության հետ:
-Ճիշտն ասած, ուզում եմ, բայց մտածում եմ, որ նրանք կարող է սադրանքի գնան. ամեն ինչ սպասելի է: Է. Մինասյանին որոշակի չափով ճանաչում եմ եւ կցանկանայի տեսնել ու նրա երեսին մի երկու բան ասել:
Հ.Գ. Փորձեցինք զրուցել նաեւ ԵՊՀ ռեկտոր Արամ Սիմոնյանի հետ, սակայն վերջինս հրաժարվեց մեկնաբանություն տալ՝ պատճառաբանելով, թե բուհը, ստեղծված իրավիճակի հետ կապված, հայտարարություն կտարածի: Ավելի ուշ տարածվեց հայտարարություն, որում ասվում է. «Վերոհիշյալ դասագիրքը, այդ թվում` նաեւ շահարկվող հատվածը, շարադրվել են միմիայն փաստական տվյալների հիման վրա եւ զերծ են պատմաբանի սուբյեկտիվ մոտեցումներից: Ակնհայտ է, որ հարցը շահարկվում է միմիայն քաղաքական նկատառումներով: Մենք հետամուտ ենք լինելու, որ ԵՊՀ-ի եւ նրա աշխատակիցների բարի համբավն ու արժանապատվությունը ոտնահարող ցանկացած փորձ արժանանա իրավական եւ բարոյական համապատասխան գնահատականի»:
.gif)
