«Ոչ թալանին » նախաձեռնության անդամ Վաղինակ Շուշանյանը քիչ առաջ Բաղրամյան պողոտայում ընթերցեց իրենց որոշումը:
Նա նշեց, թե իրենք որոշում են կայացրել` աշվի առնելով սոցիալական վիճակը, իշխանությունների և ժողովրդի միջև առկա վստահության բացակայությունը:
«Հունիսի 19-ի հավաքից հետո որոշում կայացվեց անցկացնել եռօրյա նստացույց Ազատության հրապարակում` ժամանակ տալով իշխանություններին չեղյալ համարել ՀԾԿՀ-ի որոշումը և վերանայել գործող սակագինը: Չստանալով երկրի իշխանությունների կողմից որևէ արձագանք, հունիսի 22-ին ցուցարարներն ինքնաբուխ կերպով երթով շարժվեցին դեպի Բաղրամյան 26` փորձելով այնտեղից ստանալ ժողովրդի արդար պահանջը:
Սահմանադրական դատարանի մոտակայքում հանդիպելով ոստիկանական պատնեշի, ցուցարարները հայտարարեցին խաղաղ նստացույց անցկացնելու մասին: Հունիսի 23-ի առավոտյան ոստիկանները գործադրեցին անհամաչափ ուժ, որի արդյունքում խաղաղ ցուցարարները հետապնդվեցին և բերման ենթարկվեցին: Բռնությունը քննադատվեց միջազգային բարձր ատյաններում: «Ոչ թալանին» նախաձեռնությունն ավելացրեց ևս մեկ պահանջ` պատժի ենթարկել ոստիկանական խմբերին:
Հունիսի 27-ին տարածվեց հայտարարություն, որից հետո նստացույցը շարունակվում է` նպատակ ունենալով հանրային քննարկման արդյունքում որոշել հետագա քայլերը», – նշեց նա:
Այժմ Բաղրամյանի պողոտայում ակտիվիստները որոշում են իրենց հետագա անելիքները: Վաղինակ Շուշանյանը նշեց, թե այդ ամենը կտևի մոտ 40 րոպե, սակայն հավաքված ամբոխը բղավում է «Մինչև վերջ»:
.gif)
