ԱԺ ՀԱԿ խմբակցության պատգամավոր Նիկոլ Փաշինյանը երեկ կառավարության հետ հարցուպատասխանի ընթացքում հարցրեց, թե օրերս մամուլում հրապարակումներ եղան Սերժ Սարգսյանի եղբորորդու արձակած կրակոցների մասին, ինչու օրենքով սահմանված միջոցառումներ չեն իրականացնում այս առիթով: Արդարադատության նախարար Հրայր Թովմասյանն ասաց, որ Ս. Սարգսյանի եղբորորդու կրակոցների մասին պաշտոնական հաղորդագրություն չկա, տուժողի անուն չկա: Նա նշեց, թե հարցի վերաբերյալ թույլատրելի տեղեկատվություն, որը չի անցնում նախաքննության գաղտնիության սահմանը, պատգամավորին կտրամադրվի: Նիկոլ Փաշինյանն էլ հակադարձեց, որ եթե տվյալ պարագայում չկան տուժածներ, ապա ըստ քրեական օրենքի՝ մամուլի հրապարակումները նույնպես կարելի է ընդունել որպես օրինախախտման ահազանգ: Հիշեցնենք, որ նոյեմբերի 28-ին Ալեքսանդր Սարգսյանի որդու եւ գործարար Խաչատուր Սուքիասյանի եղբոր՝ Էդուարդի միջեւ վիճաբանություն էր առաջացել մեքենան կայանելու պատճառով: Վեճը վերածվել էր ծեծկռտուքի, ավարտվել կրակոցներով: Արդյունքում Էդուարդ Սուքիասյանը ոտքից էր վիրավորվել, իսկ նրա վարորդը՝ վաղամեռիկ Սուրեն Սիրունյանի եղբայրը, մարմնի այլ մասից:
.gif)
