Էլեկտրաէներգիայի սակագնի բարձրացման դեմ պայքարի օրերին Բաղրամյան պողոտայում, բացի քաղաքական գործիչներից, ներկա էին նաև շոու-բիզնեսի բազմաթիվ ներկայացուցիչներ: Սակայն վերջին օրերին` նախագահ Սերժ Սարգսյանի հայտարարությունից հետո ցուցարարների և ոստիկանների միջև պատ կանգնող մարդկան շարքերը նոսրացել են:
Armlur.am-ը զրուցեց ռեժիսոր Արտյոմ Հակոբյանի հետ` պարզելու համար, թե որն է պատճառը, որ նա վերջին օրերին այլևս ցուցարարների կողքին չէ: Նրա խոսքով, Բաղրամյանում այժմ անորոշ վիճակ է տիրում և հայտնվել են տարբեր, անհայտ մարդիկ:
«Այն օրվանից, երբ նախագահը հայտարարեց աուդիտի մասին, երիտասարդության այն մասը, որը կազմակերպել էր և, որի հետ մեկտեղ միասին դուրս էինք եկել պայքարի, քաշվեց մի կողմ և Բաղրամյանում սկսվեց անորոշ վիճակ տիրել և հայտնվեցին անհայտ մարդիկ: Իմ այնտեղ գտնվելը` այդ մարդկանց կողքին անհիմն է, անհասկանալի և սխալ քայլ», – ընդգծեց նա:
Ռեժիսորի խոսքով, այժմ պետք է սպասել և հասկանալ, թե ինչ է լինելու շարունակությունը և ոչ թե անորոշ մարդկանց կոչերով գնալ և ինչ-որ բաներ պահանջել: Մեր այն դիտարկմանը, թե շատերը շոու-բիզնեսի ներկայացուցիչների` Բաղրամյան պողոտայում գտնվելը համարում են PR քայլ, Արտյոմ Հակոբյանը նշեց, թե ամեն մարդ սուբյեկտիվ կարծիք ունի:
«Այնպես որ չեմ գտնում, որ ամեն մեկի ասածին պետք է ինչ որ մի բան անպայման հակադարձել կամ պատասխանել: Ամեն դեպքում, ես ունեմ իմ մոտեցումը, գտել եմ, որ ես այնտեղ պետք է գտնվեմ, և մեկ շաբաթ գտնվել եմ: Մեկ շաբաթից հետո գտել եմ, որ այնտեղ իմ գտնվելը պետք չի և արդեն էլ չեմ գնում: Կարծում եմ` այդ մարդիկ մեծամասամբ այն մարդիկ են , որոնք չգիտեն, թե ինչ են ուզում, պարզապես իրենց պետք է մեկի հասցեին ինչ որ բան խոսել և խոսում են: Կարծում եմ` դա արդեն պարապությունից է, այլ ոչ թե հայրենասիրությունից», – եզրափակեց Արտյոմ Հակոբյանը:
Արփինե Թովմասյան
.gif)
