“Ազատություն” ռադիոկայանի փոխանցմամբ՝ “Ժառանգություն” կուսակցության ղեկավար Րաֆֆի Հովհաննիսյանն այսօր Վանաձորում լրագրողների հետ հանդիպման ժամանակ հայտարարել է, որ 2013 թվականի նախագահական ընտրություններին իր թեկնածությունն առաջադրելու մասին պաշտոնապես կհայտարարի դեկտեմբերի 22-ին։
“Այդ օրը մենք վերջնական տեսքի և բովանդակության կբերենք այդ նախնական հայտարարությունը, որ ես կատարեցի նոյեմբերի 2-ին և ասացի, որ ես առաջին անգամ մասնակցելու և նախագահական ընտրություններին և ես վստահ եմ, որ մենք հաղթելու ենք, որ այս անգամ ուրիշ է լինելու”, – նաև ասել է “Ժառանգության” առաջնորդը։
Ինչ վերաբերում է ընդդիմության կողմից նախագահական ընտրություններին մեկ միասնական թեկնածուով հանդես գալու հնարավորությանը, Րաֆֆի Հովհաննիսյանը հայտարարել է, որ ինքը կողմ է հավաքական թեկնածուին և պատրաստ է ողջունել բոլոր նրանց, ովքեր կզորակցեն իրեն փետրվարի 18-ին կայանալիք ընտրություններում։
“Եթե ցանկացած այլ կուսակցություն, կուսակցապետ, հասարակական շարժման պատասխանատու ուզում է զորակցել հավաքական թեկնածությունը, իմ մարմնավորած, իմ պատկերացրած Հայաստանի ծրագիրը, ես կարծում եմ, որ դա առավել շոշափելի կդարձնի առաջիկա հաղթանակը”, – նշել է Րաֆֆի Հովհաննիսյանը, համոզմունք հայտնելով, որ եթե փետրվարի 18-ի ընտրությունները լինեն միջազգային չափանիշներին և Հայաստանի սահմանադրությանը համապատասխան, ապա Հայաստանը կունենա նոր նախագահ։
.gif)
