Վանաձորի բնակչությունն այսուհետ հնարավորություն կունենա օգտվել նորագույն սարքավորումներով հագեցած և վերապատրաստված մասնագետներով համալրված բժշկական կենտրոնի ծառայություններից:
«Նորմեդ» բժշկական կենտրոնի Վանաձորի մասնաճյուղի բացմանը մասնակցեց ՀՀ առողջապահության նախարար Արմեն Մուրադյանը:
Նա շրջեց նորաբաց բժշկական կաբինետներով և վիրասրահով, ծանոթացավ կենտրոնի կողմից առաջարկվող ծառայություններին, կադրային և նյութատեխնիկական հնարավորություններին:
Նախարարը հետաքրքրվեց բուժաշխատողների աշխատավարձերի չափով:
«Նման կենտրոններն, անշուշտ, նպաստում են մեզ համար գերակա ուղղություն համարվող կանխարգելման ծրագրեր իրականացնելուն»,- լրագրողների հետ զրույցում նշեց Արմեն Մուրադյանը:
Նրա գնահատմամբ` նման կենտրոնները նպաստում են նաև մարզերում առողջապահության համակարգի հանդեպ բնակչության վստահության ձևավորմանը:
«Կենտրոնի բացումը կարևոր նշանակությւուն ունի նաև մարզերի համաչափ զարգացման տեսանկյունից: Մենք խրախուսում և ողջունում ենք մեծ ներդրումները մասնավոր հատվածում, ինչը կնպաստի նաև հիվանդների հոսքի` դեպի Երևան նվազեցմանը»,- հավելեց ՀՀ առողջապահության նախարարը:
Նորաբաց կենտրոնի ղեկավարությունը շնորհակալություն հայտնեց ՀՀ առողջապահության նախարարությանը և Լոռու մազպետարանին կենտրոնի բացմանն աջակցելու համար` ակնկալելով հետագա սերտ համագործակցություն:
Նշենք, որ «Նորմեդ» բժշկական կենտրոնի Վանաձորի մասնաճյուղը բացվել է 2007թվականին` ունենալով 20 աշխատատեղ:
Տարիների ընթացքում կենտրոնի տնօրինությունը ազգաբնակչությանն առավել որակյալ բժշկական օգնություն մատուցելու համար «Արարատ» բանկի հետ համագործակցությամբ և ֆինանսավորմամբ ծրագրեց Վանաձորում ստեղծել նոր բժշկական կենտրոն:
Վանաձոր մասնաճյուղի շինարարական աշխատանքները տևեցին շուրջ մեկ տարի: Ծրագիրը կյանքի կոչելու համար ներդրվել է 1 մլն ԱՄՆ դոլլար:
Նոր մասնաճյուղում ավելացել են մատուցվող ծառայությունների տեսակները: Ելնելով պահանջարկից` կենտրոնը հագեցվել է եվրոպական ժամանակակից սարքավորումներով, մեծ աշխատանքներ ենք տարվել կադրերին վերապատրաստելու ուղղությամբ: Ներկայումս կենտրոնի Վանաձորի մասնաճյուղի աշխատակազմը կրկնապատկվել է` հասնելով 40-ի:
.gif)
