Դեկտեմբերի 10-ին՝ կեսգիշերին, Տերյան փողոցում գտնվող «Աֆրոդիտե» կարաոկե-ակումբում ծեծկռտուք է տեղի ունեցել: Ականատեսները NEWS.am-ին պատմել են, որ երիտասարդների միջեւ վիճաբանություն է ծագել, որի ընթացքում նրանցից մեկը գարեջրի շշով հարվածներ է հասցրել մյուսի գլխին:
«Ժողովուրդ»-ը եղավ «Աֆրոդիտե» կարաոկե-ակումբում: Պարզեցինք, որ ակումբը շուրջօրյա էր, եւ մեր՝ այնտեղ լինելու պահին բավական թվով երիտասարդներ կային: Եւ մինչ տնօրենի հետ զրուցելը նկատեցինք, որ ակումբում մի խումբ հարբած երիտասարդների միջեւ վեճ էր հասունանում: Ավելի ուշ ոստիկանության պահպանության աշխատակիցների այցը կարծես զսպեց լարված մթնոլորտը: Մեզ հետ հեռախոսազրույցում ակումբի տնօրեն Սասունը նշեց, թե դեկտեմբերի 10-ին ծեծկռտուք տեղի չի ունեցել, այլ պարզապես թյուրիմացություն է եղել: «Տղաներից մեկը շփոթել է եւ ձեռքը դրել ակումբում գտնվող աղջիկներից մեկի ուսին: Դրա պատճառով էլ մի փոքր քաշքշուկ է տեղի ունեցել, ուրիշ ոչ մի բան չի եղել»,-նշեց նա: Իսկ երբ տնօրենին տեղեկացրինք, որ մենք ակումբում ենք եւ ցանկանում ենք իր հետ հանդիպել, վերջինս խիստ վրդովվեց եւ ասաց, թե զբաղված է եւ չի կարող գալ` ավելացնելով, թե այլ մանրամասներ ակումբը չի ցանկանում հայտնել: «Կարող եք գրել՝ ոնց ուզում եք: Գրել էին, թե մեր ակումբում ամեն օր էլ նմանատիպ վեճեր են լինում: Ես կարող եմ հանգիստ դատի տալ»,-ձեռքի հետ սպառնաց Սասունը` անջատելով հեռախոսը:
Ակումբում գտնվող տղաներից մեկը, երբ տեղեկացավ, որ ծեծկռտուքի հետքերով ենք եկել, ասաց. «Իսկ իմացե՞լ եք, թե այդ տղան ազգությամբ ինչ էր, ինչացու էր, պարսիկ էր, թե չէ»: Երբ փորձեցինք մանրամասներ իմանալ, նրան լռեցրին:
«Աֆրոդիտե»-ի տարածքում գտնվող կրպակներից մեկի աշխատակիցը, որի անունը հարգելի պատճառներով չեն հրապարակում, «Ժողովուրդ»-ի հետ զրույցում հաստատեց ակումբում կեսգիշերին տեղի ունեցած ծեծկռտուքի մասին լուրը՝ նշելով, որ ինքն ականատես է եղել: Նաեւ հավելեց. «Համարյա ամեն օր էլ երիտասարդները խմում են եւ կորցնում իրենց: Գրեթե միշտ էլ վեճեր են լինում: Երբ տեսնում եմ, որ կռիվ է կամ երիտասարդները սկսում են այս ու այն կողմ վազվզել, ես արագ ներսից փակում եմ խանութս, որ ներս չմտնեն»:
Հավելենք, որ չնայած ակումբի տնօրենի հերքումներին՝ ծեծկռտուքից հետո ոստիկանության Կենտրոնի բաժին է բերման ենթարկվել մի երիտասարդ:
.gif)
