ԱԺ նախկին պատգամավոր, ՀՀԿ-ական Հակոբ Հակոբյանը (Ճոյտ) «Ժողովուրդ»-ի հետ զրույցում վստահեցրեց, որ ճիշտ կլինի, եթե ԲՀԿ առաջնորդ Գագիկ Ծառուկյանը մյուս նախագահական ընտրություններում իր թեկնածությունն առաջադրի:
-Պարո՛ն Հակոբյան, այժմ քաղաքական դաշտում խառը իրավիճակ է, ՀՀԿ-ի ու ԲՀԿ-ի միջեւ կարծես թե «սեւ կատու» է անցել, ու մշտական անհասկանալի պայքար է սկսվել: Որպես նախկին պատգամավոր՝ ինչպե՞ս եք գնահատում այս իրավիճակը:
-ՀՀԿ-ն այսօր կայացած քաղաքական ուժ է, որն ՕԵԿ-ի հետ երկրի ամբողջ պատասխանատվությունը վերցրել է իր վրա, բայց դե այստեղ կա նաեւ մրցակցություն: Քաղաքական դաշտում ու նաեւ կյանքում միշտ լինում է այնպես, որ երբ կայանում ես, ցանկանում ես արդեն անկախ դրսեւորվել, ցանկացած բնագավառում էլ մարդիկ կայանում են: Հիմա, կոնկրետ ԲՀԿ-ի հետ կապված, նրանք արդեն կայացել են, իրենց քննությունն էլ տվել են մայիսին կայացած ընտրությունների ժամանակ:
-Դուք ժամանակին մտերմիկ հարաբերությունների մեջ էիք ԲՀԿ առաջնորդ Գագիկ Ծառուկյանի հետ, տեղեկություններ կային անգամ, որ ցանկանում էիք ԲՀԿ-ական դառնալ: Ի՞նչ եք կարծում, ի՞նչ է մտադիր անել Ծառուկյանը:
-Ես, ճիշտ է, շատ մոտիկ հարաբերությունների մեջ եմ եղել, եւ այժմ էլ նորմալ հարաբերությունների մեջ ենք, բայց ինձ երբեք առաջարկություն չի եղել ԲՀԿ-ական դառնալ: Իսկ ինչ վերաբերվում է նրա առաջադրվելուն, ապա կարծում եմ, որ շատ ավելի ճիշտ կլինի՝ Ծառուկյանը չառաջադրվի, որվհետեւ, իմ կարծիքով, դեռ ժամանակ է պետք ավելի խորքային մտածելու, ավելի շատ կայանալու համար: Մի քիչ սպասել է պետք, մի քիչ ժողովրդի վստահությունը վաստակել է պետք՝ աշխատանքով: Եթե իմ խորհուրդը կլսի, ապա ես կառաջարկեի, որ այս ամենից հետո նոր առաջադրվի:
-Բա ասում էիք՝ մայիսի ընտրությունների ժամանակ ԲՀԿ-ն արդեն կայացել է: Այսինքն՝ Գագիկ Ծառուկյանը չունի՞ նախագահ դառնալու պոտենցիալ:
-Ինքը ունի, բայց որ ինքը մրցելու է, արդեն իսկ պետության պատասխանատվությունը վերցրած քաղաքական ուժի հետ, դա արդեն շարքերի հարաբերակցությունը պակասեցնում է: Ես կարծում եմ, որ հիմա չպետք է առաջադրվի, այլ հաջորդ նախագահական ընտրություններում, որովհետեւ վայելում է ժողովրդի հարգանքն ու սերը, վստահությունը, պարզապես այս անգամ չպետք է առաջադրվի: Ավելի լավ ու մանրակրկիտ պետք է պատրաստվի մյուս նախագահական ընտրություններին:
-Տեղեկություններ կան, որ անգամ Ծառուկյանը չգիտի, թե ինչ անի, ինչպես լուծի այդ հարցը եւ ինչ-որ հուշումների է սպասում: Նշվում է նաեւ, որ հիմնականում սպասում է Մոսկվայի պատասխանին:
-Ես կարծում եմ՝ Ծառուկյանն իմ նման է մտածում, եթե ես չեմ սխալվում՝ ինքը չի առաջադրվի, դա իմ կարծիքն է: Ախր միայն առաջադրվելը չէ, պետք է նաեւ հաղթի, հետագա զարգացում ապահովի երկրի համար: Գիտեք ինչ, 70-80 տարի է՝ մենք ամեն ինչը կապում ենք Մոսկվայի հետ՝ թե՛ դրական առումով, թե՛ բացասական: Եթե այնտեղ կլինեն այնպիսի ուժեր, որոնք կփորձեն թելադրել ինչ-որ բաներ, ապա ես դա բացասական եմ գնահատում: Մենք անկախ պետություն ենք, եւ երբեք չէի ուզենա, որ այլ պետության ղեկավարները կամ քաղաքական գործիչները մեզ ուղղորդեին: Կարող են խորհուրդներ տալ, բայց ոչ ուղղորդել, դա հասարակությունը չի ընդունի, եւ կարծում եմ՝ ոչ ոքի համար էլ դա ընդունելի երեւույթ չէ:
-Իսկ որպես գործարար՝ ՀՀ վարչապետ Տիգրան Սարգսյանի գործունեությունը Ձեզ որքանո՞վ է բավարարում:
-Գիտեք ինչ, շատ լուրջ խնդիր է քննարկման համար, որովհետեւ ասում են՝ դու պետք է մեջը լինես, որ կարողանաս ինչ-որ բան տեսնել: Ես կարծում եմ, որ այդքան էլ բացասական չէ, ինչքան որ ներկայացնում են, օրինակ՝ վարչապետը շատ պրոֆեսիոնալ է միջազգային կառույցների հետ աշխատելիս, հատկապես ֆինանսական խնդիրները լուծելու հարցում: Վարչապետի գործոնը շատ կարեւոր է, ինքն արդեն թրծվել է, կայացել է Կենտրոնական բանկում եւ գիտի բոլոր պահանջները՝ բանակցությունների սեղանին նստելու ժամանակ:
.gif)
