ՌԴ և ԼՂՀ իշխանությունների միջև երկխոսություն է ընթանում Ստերլիգովի հարցով. ի՞նչ արդյունք կլինի

Ռուս միլիարդատեր, քաղաքական ու հասարակական գործիչ, «Ալիսա» բորսայի հիմնադիր Գերման Ստերլիգովը հուլիսի 4-ին իր ընտանիքի անդամների հետ հեռացել է Ռուսաստանից ու բնակության նպատակով տեղափոխվել Լեռնային Ղարաբաղի Հանրապետություն: Ռուսական մամուլի հրապարակումների համաձայն` Ստերլիգովը ԼՂՀ-ում պատրաստվում է էկոլոգիապես մաքուր գյուղմթերքի արտադրւթյամբ զբաղվել եւ արդեն իսկ այդ նպատակով հողատարածքներ է փնտրում:

Այն բանից հետո, երբ հայտնի դարձավ ռուս գործարարի` ԼՂՀ տեղափոխվելու մասին, թե՛ ռուսական եւ թե՛ ադրբեջանական մամուլում տարատեսակ հրապարակումներ հայտնվեցին: Չգիտես ինչու` ռուս միլիարդատիրոջ` Ղարաբաղում հայտնվելու փաստից ադրբեջանցիները իրար խառնվեցին: Իր այցելության նպատակի եւ առաջիկա ծրագրերի վերբերյալ տարատեսակ մեկնաբանություններին վերջ տալու նպատակով երեկ գործարարը «ՎԿոնտակտե» սոցցանցի իր էջում հայտարարել է, որ երկուշաբթի՝ հուլիսի 13-ին, ասուլիս է տալու եւ այդ նպատակով լրագրողներին հրավիրում է «ծաղկող այգի` Լեռնային Ղարաբաղի հնագույն հայկական Շուշի քաղաք` ճշմարտությունն իմանալու»: Ստերլիգովի այս հայտարարությանը արձագանքել է Ադրբեջանի ԱԳՆ-ն` այդ ասուլիսը «սադրանք» որակելով եւ հորդորելով ԶԼՄ-ների ներկայացուցիչներին չանսալ Ստերլիգովի կոչին եւ չմեկնել Շուշի:

«Ժողովուրդ»-ի տեղեկությունների համաձայն՝ ռուս գործարարի այցելության եւ հետագա ծրագրերի մասին որեւէ հստակ տեղեկատվություն չունեն նաեւ ԼՂՀ իշխանությունները, որոնց այս պահին ավելի շատ մտահոգում է այն, որ ռուս գործարարի այս քայլի արդյունքում խնդիրներ չծագեն ՌԴ իշխանությունների հետ: Այսինքն՝ Արցախի իշխանությունները չեն ցանկանում, որ տպավորություն ստեղծվի, թե ԼՂՀ-ն ընդունում է մարդկանց, որոնք փախնում են իրենց երկրից: Այդ նպատակով այս օրերին ԼՂՀ իշխանությունները փորձում են ՌԴ-ից ճշտել` արդյոք Ստերլիգովը իր հայրենիքում իրավապահ համակարգի հետ խնդիրներ ունի, թե ոչ:

Ըստ «Ժողովուրդ»-ի տեղեկությունների՝ ԼՂՀ իշխանություններն անգամ այս ժամանակահատվածում հանդիպում չեն ունեցել Գերման Ստերլիգովի հետ՝ պարզելու նրա նպատակներն ու ցանկությունները: Արցախի իշխանություններն այս օրերին փորձում են հստակեցնել իրենց անելիքները, քանի որ Գերման Ստերլիգովը ԼՂՀ-ում է գտնվում որպես զբոսաշրջիկ: Սա մասնավոր այց է, որի վերաբերյալ ԼՂՀ իշխանությունները կանխավ որեւէ տեղեկություն չեն ունեցել: Ի դեպ, դեռեւս հստակեցված չէ նաեւ Գերման Ստերլիգովի ասուլիսի ձեւաչափը, որը որոշ հարցերի հստակեցումից հետո միայն կկայանա:

Տեղեկացնենք, որ այս օրերին ռուս գործարարը` ընտանյոք հանդերձ, հանգրվանել է Շուշի քաղաքի «Շուշի պլազա» հյուրանոցային համալիրում:

Երեկ «Ժողովուրդ»-ը զրուցել է ԼՂՀ նախագահ Բակո Սահակյանի մամլո խոսնակ Դավիթ Բաբայանի հետ՝ պարզելու համար, թե ինչպես են ԼՂՀ իշխանությունները վերաբերվում Գերման Ստերլիգովի` Արցախում բնակություն հաստատելու որոշմանն ու ի՞նչ կարգավիճակ են պատրաստվում տալ նրան:

-Պարո՛ն Բաբայան, սկանդալային համբավով ռուս հայտնի միլիարդատեր Գերման Ստերլիգովը որոշել է բնակություն հաստատել Արցախում: Ինչպե՞ս է այս հարցին վերաբերվում ԼՂՀ իշխանությունը, արդյո՞ք պատրաստ եք նրան կեցության վայր տրամադրել:

-Ես տեղյակ եմ, որ Գերման Ստերլիգովը Արցախ այցելել է որպես զբոսաշրջիկ, իսկ մեր պետությունը ժողովրդավարական ազատ երկիր է, ու մեր երկիր տարբեր մարդիկ են այցելում: Ես տեղյակ եմ, որ նա այցելել է Արցախ, բայց թե ինչ ցանկություններ ունի՝ ուզում է մնալ Արցախում, թե չէ, դա կտեսնենք առաջիկայում: Մենք ազատ երկիր ենք, մեզ համար որեւէ այդպիսի խնդիր չկա, ու ես չեմ հասկանում, թե ինչու են անընդհատ շահարկում այս թեման, ինչու են փորձում այս ամենը այլ ձեւով ներկայացնել: Մարդը եկել է Արցախ, զբոսաշրջիկ է, ու բոլորն են Արցախ գալիս, ես անհասկանալի եմ համարում այս շահարկումները: Այս պահի դրությամբ նա Արցախում որպես զբոսաշրջիկ է:

-Իսկ ԼՂՀ իշխանություններն այս ընթացքում հանդիպել են Ստերլիգովի հետ, արդյո՞ք որոշվել է, թե նա ի՞նչ կարգավիճակով է շարունակելու բնակվել Արցախում:

-Նման բան չի եղել: Շատ վաղաժամ է նման բաների մասին խոսելը, քանի որ այդ մարդը որպես զբոսաշրջիկ է եկել Արցախ, թե ինչ նպատակներ, ինչ պլաններ ունի իր կյանքի հետ կապված, դա ցույց կտա ժամանակը: Վստահեցնում եմ, որ այս պահի դրությամբ դրա մասին խոսելը շատ վաղաժամ է:

-Իսկ ի՞նչ կասեք այն մտավախություններին ի պատասխան, թե Արցախը կարող է Ռուսաստանի հետ խնդիրներ ունենալ` Գերման Ստերլիգովին բնակության թույլտվություն տալու պատճառով: Այդ հարցը չի անհանգստացնո՞ւմ ԼՂՀ իշխանություններին:

-Կրկնում եմ, որ նա Արցախ է եկել որպես զբոսաշրջիկ: Ռուսաստանից Արցախ ժամանած զբոսաշրջիկները բավականին պատկառելի մաս են կազմում: Երեւի ԱՄՆ-ն եւ ՌԴ-ն համահավասար քանակությամբ զբոսաշրջիկներ ունեն Արցախում, առ այսօր որեւէ խնդիր, որեւէ պետության հետ մենք չենք ունեցել: Ու ես հույս ունեմ, որ մենք որեւէ խնդիր այդ հարցի հետ կապված չենք էլ ունենալու: Նա որեւէ ապօրինի գործողություն Արցախում չի արել, նա զբոսաշրջիկ է, իսկ զբոսաշրջիկներն ունեն իրավունք տարբեր երկրներ այցելելու, այդպիսի որեւէ քաղաքական խնդիր առ այսօր չկա: Հազարավոր զբոսաշրջիկներ են Արցախ գալիս, եթե ինչ-որ մեկը ինչ-որ ցանկություն է հայտնում, դա իր իրավունքն է, որեւէ բան մենք չենք կարող անել: Կրկնում եմ՝ Արցախը ժողովրդավարական երկիր է, ու մենք ընդունում ենք բոլոր նրանց, ովքեր մեր երկիր են գալիս: Այս պահին Արցախում հազարավոր զբոսաշրջիկներ կան:

Զրուցեց ՍՈՆԱ ԳՐԻԳՈՐՅԱՆԸ