Որտեղի՞ց է այդքան փող դիզել Աբովյանի նորընտիր քաղաքապետը

Աբովյանի նորընտիր քաղաքապետ Վահագն Գեւորգյանի դրամական միջոցները, ըստ նրա ներկայացրած հայտարարագրի, կազմում են 23 հազար 700 դոլար, 19 հազար 500 եվրո եւ 850 հազար դրամ: Բացի այս՝ նա ունի մեկ բնակարան եւ երկու` «Toyota Land Cruiser 200 4.0» եւ «BMW 745» մակնիշի ավտոմեքենաներ:

Նշենք, որ նորընտիր քաղաքապետն իր պաշտոնը ստանձնելուց հայտարարագրում նշել է, որ այս տարվա հինգ ամիսներին ստացած իր աշխատավարձը կազմել է 1 մլն 562 հազար դրամ: Բացի այդ, ըստ հայտարարագրի, նա 380 հազար դրամով ինչ-որ գույք է օտարել: Իսկ թե որտեղի՞ց է այդքան փող դիզել, անհայտ է մնում: Նա մշտապես աշխատել է բացառապես պետական հիմնարկում՝ Ազգային ժողովում, որտեղ այդքան էլ բարձր աշխատավարձ չեն ստանում:

Վահագն Գևորգյանը խորհրդարանում աշխատում է դեռևս առաջին գումարման Ազգային ժողովից և շփումներ է ունեցել, ունի գրեթե բոլոր քաղաքական ուժերի և գործիչների հետ: Նրան ԱԺ-ում գրեթե բոլորը ճանաչում են, իսկ ընտրություններում նրան սատարում էին իշխող Հանրապետական կուսակցությունն ու ԲՀԿ-ն: Բայց աբովյանցիների լայն շրջանում նա այնքան էլ լայն ճանաչում չուներ:

Ու թեև նա մշտապես պետական պաշտոն է զբաղեցրել, այնուամենայնիվ, հասցրել է նաև բիզնեսների տեր դառնալ՝ օգտագործելով իր կապերն ու դիրքը: Ինչպես հայտնի է, նա ռուսաստանաբնակ հայերից մեկի՝ «Բինգո-բոոմ» բուքմեյքերական-խաղարկային բիզնեսին մոտ կանգնած ոմն Արմանի քավորն է, մանկության ընկերը: Քանի որ մեր օրերում քավորներին պատահաբար չեն ընտրում, ուստի Վահագն Գևորգյանին ևս պատահաբար չեն ընտրել: Փոքր ժամանակ Վահագնը փրկել-հանել է կրակն ընկած Արմանին՝ հետագայում դառնալով նրա քավորը: Տեղեկացնենք, որ «Բինգո-բոոմ»-ի Արմանը Ռուսաստանում ֆինանսավորում է «Եդինայա Ռոսիայի» երիտասարդական թևը: