ԱԺ մի խումբ պատգամավորների օգնականներ այս օրերին խորհրդարանում «կոալիցիա» են կազմել՝ բողոքելով, որ ԱԺ շենք ազատ ելումուտի անելու համար իրենց ոչ թե վկայականներ են տվել, այլ անցագրեր: Օգնականների խումբն այս հարցով նույնիսկ պատրաստվում է բողոքել ԱԺ ղեկավարությանը: «Ժողովուրդ»-ի հետ զրույցում ԱԺ անձնակազմի կառավարման վարչության պետի պաշտոնակատար Հռիփսիմե Խանամիրյանը տեղեկացրեց, որ այս գումարման խորհրդարանի պատգամավորների օգնականների համար նախատեսված է անցագրի այդ ձեւը: «Այդ անցագրերը կամ վկայականները մեկ նպատակի համար են՝ ԱԺ շենք ազատ ելումուտ անելու համար, եւ երկուսն էլ անարգել հնարավորություն են ընձեռում ԱԺ շենք մտնելու համար: Ուստի անհասկանալի է բարձրացված աղմուկը»,-ասաց նա: «Ժողովուրդ»-ի աղբյուրները, սակայն, պնդում են, որ ԱԺ պատգամավորների օգնականներին գրքույկի տեսքով վկայականները հարկավոր են մեկ բանի համար, որպեսզի ճանապարհային ոստիկանության աշխատակիցների հետ հեշտ լեզու գտնեն կամ անարգել մտնեն տարբեր պետական հիմնարկներ: Այլ կերպ ասած՝ նրանք ոչ թե վկայական, այլ «նարուշիլովկա» են ուզում:
.gif)
