«Մոր և մանկան, դեռահասների առողջության պահպանման ազգային ծրագրերի ռազմավարության պլանավորում և արժեքների գնահատում» թեմայով միջերկրային սեմինարը միավորել է Առողջապահության համաշխարհային կազմակերպության եվրոպական տարածաշրջանի յոթ անդամ երկրի 45 մասնակիցների:
ՀՀ առողջապահության նախարար Արմեն Մուրադյանը, ողջունելով սեմինարի մասնակիցներին, նշեց, որ մոր և մանկան առողջության պահպանման ոլորտում իրականացվող քննարկումները, մասնավորապես ծախսարդյունավետությանը վերաբերող խնդիրները` խիստ արդիական են:
«Հաշվի առնելով, որ այս ուղղությունը պահանջում է մշտական մեծ ծախսեր` մենք, անշուշտ, մեծ տեղ ենք տալիս նման քննարկումներին»,- ասաց Արմեն Մուրադյանը` շնորհակալություն հայտնելով ԱՀԿ եվրոպական տարածաշրջանային գրասենյակին այս միջոցառումը կազմակերպելու համար:
Նա սեմինարի մասնակիցներին մաղթեց արգասաբեր և արդյունավետ աշխատանք` հանուն երեխաների, հանուն մոր և մանկան առողջության:
Մեր երկիր ժամանած մասնագետները նշեցին, որ մոր և մանկան, դեռահասների առողջության պահպանման ազգային ծրագրերի ռազմավարության պլանավորման և արժեքների գնահատման հիմքերից են Առողջապահության համաշխարհային կազմակերպության եվրոպական տարածաշրջանի «Առողջություն 2020» համապարփակ քաղաքականության դրույթները:
Ներկայացվեցին այս քաղաքականության ղեկավարող սկզբունքներն ու առավելությունները: Ընդգծվեց բնակչության առողջության բարելավմանն ուղղված այս ծրագրի` ըստ յուրաքանչյուր երկրի բնակչության առանձնահատկության տեղայնացման, մշակման և ներդրման անհրաժեշտությունը:
ՀՀ առողջապահության նախարարության երեխաների առողջության պահպանման բաժնի պետ Նունե Փաշայանն իր զեկույցում ներկայացրեց մոր և մանկան ոլորտում Հայաստանում գրանցված հիմնական հաջողություններն ու խնդիրները:
Նա նշեց, որ 2008թ. հետո Ծննդօգնության և Երեխայի առողջության պետական հավաստագրերի ներդրման շնորհիվ վերջին հինգ-վեց տարում մոր և մանկան առողջության պահպանման ոլորտում էականորեն բարելավվել է բուժօգնության որակը, նվազել են մայրական և մանկական մահացության հիմնական ցուցանիշները:
Բարեփոխումները նպաստել են նաև բուժաշխատողների աշխատավարձերի ավելացմանը, դեղերով ապահովվածությանը:
Աշխատանքներ են տարվել նաև մարզերում մանակական վերակենդանացման ծառայության բարելավման ուղղությամբ:
Նունե Փաշայանն անդրադարձավ նաև նորածնային սկրինինգների արդյունավետությանը, միջազգային կազմակերպությունների հետ ՀՀ առողջապահության նախարարության սերտ համագործակցությանը:
Մասնագետի խոսքով` շարունակում են օրակարգային մնալ մանկաբույժների վերապատրաստման, բուժօգնության որակի բարելավման, հավելյալ ֆինանսավորման հարցերը:
ՀՀ առողջապահության նախարարի տեղակալ Սերգեյ Խաչատրյանը նշեց, որ այս հանդիպման հիմնական նպատակը ծրագրավորման մի նոր գործիքին ծանոթացնելն է։ Դա հնարավորություն է տալիս գործող ծրագրերի ծախսերի կանխատեսումներ անել և ռազմավարական գնահատականներ տալ։
«Այն մշակել են ԱՄՆ-ի փորձագետները, ընդունվել է Առողջապահության համաշխարհային կազմակերպության կողմից։ Մանրամասն կքննարկվեն ծրագրային այս մոտեցման հնարավորությունները և կիրառման ուղիները։ Դրանք նախատեսված են առողջապահական ամբողջ համակարգի, այդ թվում` հանրային առողջապահական խնդիրների լուծման համար»-ասաց փոխնախարարը` հավելելով, որ մոր և մանկան առողջության պահպանման խնդիրներն ամբողջ աշխարհում առաջնահերթություն են, ուստի գործիքի կիրառումն առաջին հերթին արդիական է այս ոլորտում։
Լրագրողների հետ զրույցում ՀՀ առողջապահության նախարար Արմեն Մուրադյանը նշեց, որ առողջապահության տարեկան բյուջեի շուրջ 35-40 տոկոսն ուղղվում է մոր և մանկան ոլորտին: Նա ընդգծեց, որ ծախսարդյունավետության մասին խոսելիս առաջնահերթությունը տրվում է արդյունքներին:
Նախարարը կարևորեց մանկական ծրագրերի հզորացումը, չափորոշիչների մշակումը, ինչպես նաև ֆինանսավորմանն ուղղված քայլերի անհրաժեշտությունը:
.gif)
