Քաղաքացի Քրիստինե Գ.-ն ՀՀ ոստիկանության Շենգավիթի բաժնում հաղորդում է տվել այն մասին, որ 2015 թվականի հունվարի 11-ին Արտակ Գ.-ի հետ տաքսի ավտոմեքենայով ուղևորվելիս է եղել Երևանի Բագրատունյաց և Արտաշատի խճուղու խաչմերուկ: Տաքսի ավտոմեքենայի հեռանալուց հետո, Արտակ Գ.-ն պահանջել է իրենից իր մոտ եղած գումարը և մերժում ստանալով՝ բռունցքով հարվածներ է հասցրել դեմքին, այնուհետև ձեռքից բացահայտ հափշտակել է իր «Ալկատել» տեսակի բջջային հեռախոսը: Դրանից հետո Արտակ Գ.-ն ձեռքը մտցրել է իր գրպանը և կրկին բացահայտ հափշտակել 10 հազ. ՀՀ դրամ և հեռացել:
Դեպքի առթիվ ՀՀ քննչական կոմիտեի Շենգավիթ վարչական շրջանի քննչական բաժնում ՀՀ քրեական օրենսգրքի 176-րդ հոդվածի 2-րդ մասի 4-րդ կետով հարուցվել է քրեական գործ և շուրջ 7 ամիս կատարվել նախաքննություն:
Արտակ Գ.-ն նախաքննական մարմնին հայտնել է, որ դեպքի օրը ինքը գտնվել է Հայաստանի Հանրապետության սահմաններից դուրս, հետևաբար չէր կարող կատարել իրեն մեղսագրվող հանցագործությունը:
Հետագայում գործի փաստական հանգամանքներով պայմանավորված՝ լրիվ, օբյեկտիվ և բազմակողմանի քննությունը երաշխավորելու անհրաժեշտությունից ելնելով՝ քրեական գործը քննության է ուղարկվել ՀՀ հատուկ քննչական ծառայություն:
Նախաքննությունը շարունակվում է:
.gif)
