Ելնելով այն իրողությունից, որ Ահարոն Ադիբեկյանի սոցիոլոգիական ծառայություններն այլեւս որեւէ հավատ չէին ներշնչում, իշխանությունները որոշեցին խաղարկել համեմատաբար ավելի թարմ եւ հեղինակավոր արեւմտյան սոցիոլոգիական բրենդի` «Գելափ»-ի անունը: Այդ նպատակով դեռեւս նախորդ նախագահական ընտրություններից առաջ «Արմնյուզ» հեռուստաընկերությունը սոցիոլոգիական հարցումներ պատվիրեց «Գելափ»-ին, որոնց արդյունքներն ընդունվեցին «հալած յուղի տեղ»: Սակայն ավելի ուշ, երբ պարզ դարձավ, որ այդ ծրագիրն իրականացվում է Հայկական սոցիոլոգիական ասոցիացիայի հետ համատեղ, շատերի մոտ հարցեր առաջացան` կապված այդ ուսումնասիրությունների արդյունքների արժանահավատության հետ: Եվ հիմա` արդեն անգամ «Գելափ» բրենդն առանձնապես չի օգնում, քանի որ ինչպես կատակով ասում են փորձագիտական շրջանակներում` սա «չինական «Գելափ» է»: Երեկ հրապարակվեցին այդ «խառնածին գելափի» վերջին հարցումների արդյունքները, ըստ որոնց՝ առաջիկա նախագահական ընտրություններում Հայաստանի բնակչության 49 տոկոսն իր ձայնը կտա Սերժ Սարգսյանին, 21 տոկոսը` Գագիկ Ծառուկյանին, 6 տոկոսը` Լեւոն Տեր-Պետրոսյանին եւ 5-ական տոկոսներ` Ռոբերտ Քոչարյանին ու Րաֆֆի Հովհաննիսյանին: Ուշագրավ է, որ այդ հետազոտությունն իրականացվել է դեկտեմբերի 5-ից 14-ն ընկած ժամանակահատվածում, մինչդեռ դեկտեմբերի 12-ին արդեն Գ. Ծառուկյանը հայտարարել էր, որ չի առաջադրվելու: Այնուամենայնիվ, հարցման հեղինակները հաշվի են առել նաեւ Ծառուկյանի չառաջադրվելու հավանականությունը եւ պարզել, որ այդ դեպքում նրա պոտենցիալ ընտրողների ձայների 36 տոկոսը կգնա Ս. Սարգսյանին, 13 տոկոսը` Ռ. Քոչարյանին, 9 տոկոսը` Ր. Հովհաննիսյանին եւ միայն 4 տոկոսը` Լ. Տեր-Պետրոսյանին: Սա, իհարկե, բավականին ուշագրավ արդյունք է` Օսկանյանի բնորոշմամբ` ԲՀԿ-ՀԱԿ «սիլի-բիլիի» պարագայում: Այս հարցման մեջ Ծառուկյանի հետ կապված եւս մեկ ուշագրավ պահ կա. այն է` հասարակության վերաբերմունքը Ծառուկյանի նկատմամբ 72 տոկոսով դրական է, այն դեպքում, երբ Ս. Սարգսյանի հանդեպ դրական է հարցվողների ընդամենը 61 տոկոսի վերաբերմունքը: Հետաքրքիր է, արդյոք նման ցուցանիշի վրա ազդեցություն չի ունեցել Ծառուկյանի` դեկտեմբերի 12-ին հրապարակած չառաջադրվելու որոշումը: Ինչ վերաբերում է հասարակության դրական վերաբերմունքի մասով Լ. Տեր-Պետրոսյանի ցուցանիշին, ապա այն կազմում է ընդամենը 17 տոկոս, նույնքան` որքան Հրանտ Բագրատյանի մոտ: Սակայն այստեղ էլ բավականին հարցահարույց է Արթուր Բաղդասարյանի ցուցանիշը, որն ավելի բարձր է` 23 տոկոս, քան Տեր-Պետրոսյանինը: Ասել է թե` ըստ «Գելափ»-ի, ժողովուրդն Ա. Բաղդասարյանին ավելի շատ է սիրում, քան Լ. Տեր-Պետրոսյանին: Ամփոփելով «խառնածին գելափի» հարցումները` հիշեցնենք, որ ընդամենը մեկուկես ամիս առաջ նրանց հրապարակված մեկ այլ հարցման տվյալներով՝ Ս. Սարգսյանին պատրաստ էր իր ձայնը տալ բնակչության ընդամենը 28 տոկոսը:
.gif)
