ԷԼԻ ՋՐԻՑ ՉՈՐ ԴՈՒՐՍ ԵԿԱՎ

Իջեւանի տարածաշրջանում հանրային պաշտպանի գրասենյակի նախկին փաստաբան Ռադիկ Պապյանը, լինելով քրգործով մեղադրյալ Էդվարդ Քոսակյանի շահերի պաշտպանը, վերջինիս նախնական կալանքից ազատելու պատրվակով նրա հորը՝ Սերժիկ Քոսակյանին, դրդել է կաշառք տալ իր ծանոթ պաշտոնատար անձանց եւ խաբեությամբ հափշտակել նրա 3000 ԱՄՆ դոլարը: Պապյանն իր ծանոթ պաշտոնատար անձանց կաշառք տալու եւ պաշտպանյալ Է. Քոսակյանի նկատմամբ քրեական հետապնդումը դադարեցնելու նպատակով Ս. Քոսակյանից պահանջել է 5000 դոլար, ապա վստահությունն ամրապնդելու նպատակով 2011թ. փետրվարի 28-ին Է. Քոսակյանին է վերադարձրել վերջինիս անձնագիրը` հավաստիացնելով, որ քրգործը կարճվել է: Է. Քոսակյանն էլ Բագրատաշենի մաքսային անցակետով լքել է ՀՀ-ի տարածքը, ինչի համար վերջինիս նկատմամբ հայտարարվել է հետախուզում, եւ որպես խափանման միջոց է ընտրվել կալանավորումը: Գիտակցելով, որ Ռ. Պապյանը նպատակ է հետապնդում հափշտակել իր 5000 դոլարը, Ս. Քոսակյանը հրաժարվել է նրան գումար տալ: 2012թ. սեպտեմբերի 14-ին Տավուշի մարզի ընդհանուր իրավասության դատարանի դատավոր Ռաֆիկ Մելքոնյանը վճռել է Ռ. Պապյանին մեղավոր ճանաչել ՀՀ քր. օր.-ի 178 հոդվ. 2-րդ մասի 2-րդ կետով, 34-178 հոդվ. 2-րդ մասի 2-րդ կետով եւ 38-34-312 հոդվ. 3-րդ մասի 1-ին կետով: Դատարանը վճռել է վերը նշված 2 հոդվածներով Ռ. Պապյանին դատապարտել 500 000-ական դրամ տուգանքի եւ ՀՀ անկախության հռչակման 20-րդ տարեդարձի առթիվ համաներում հայտարարելու մասին ԱԺ 2011թ. մայիսի 26-ի որոշման կիրառմամբ նրան ազատել այդ տուգանքներից: Դատարանը վճռել է ՀՀ քր. օր.-ի 38-34-312 հոդվ. 3-րդ մասի 1-ին կետով Ռ. Պապյանին դատապարտել 3 տարի ժամկետով ազատազրկման եւ կիրառել համաներում հայտարարելու մասին ԱԺ 2011թ. մայիսի 26-ի որոշումը ու նշանակված ազատազրկման ձեւով պատժի չկրած մասը կրճատել մեկ քառորդով: Ռ. Պապյանը բողոքարկել էր այդ դատավճիռը՝ պահանջելով իրեն անպարտ ճանաչել: Դեկտեմբերի 7-ին վերաքննիչ քրեական դատարանը (նախագահող դատավոր Ս. Համբարձումյան, դատավորներ Ա. Պետրոսյան, Մ. Պետրոսյան) որոշել է վերաքննիչ բողոքը մասնակիորեն բավարարել: Դատարանը վճռել է, որ փաստաբանի կատարած արարքները պետք է որակվեին միայն Քր. օր.-ի 178-րդ հոդվ. 2-րդ մասի 2-րդ կետով եւ 34-178-րդ հոդվ. 2-րդ մասի 2-րդ կետով՝ առանց 38-34-312-րդ հոդվ. 3-րդ մասի 1-ին կետով (կաշառք տալուն դրդելու փորձ) լրացուցիչ որակման: Մինչ ընթանում էր Ռ. Պապյանի դատավարությունը, նա բաժանվել է իր կնոջից՝ խարդախության համար դատվող, թոշակառուներից ավելի քան 10 մլն դրամ յուրացրած, Իջեւանի զինկոմիսարիատի ֆինանսատնտեսական բաժանմունքի նախկին պետ Հրանուշ Ներկարարյանից, եւ ամուսնացել դիլիջանցի մի աղջկա հետ: Ռ. Պապյանը շարունակում է զբաղվել փաստաբանական գործունեությամբ, իրավագիտություն է դասավանդում «Գալիք» համալսարանի Իջեւանի մասնաճյուղում: Նախկինում նա հայտնվել է տարբեր պատմությունների մեջ, սակայն ամեն անգամ «ջրից չոր է դուրս եկել»: Այս անգամ էլ նրան հաջողվեց խուսափել ազատազրկումից եւ տուգանքներից:   Դատախազությունը 1 ամիս ժամկետում կարող է բողոքարկել վերաքննիչ դատարանի վճիռը: