ՀԱՐՑ. Որդուս երրորդ երեխան ծնվել է նոյեմբերի 3-ին. ընդամենը օրեր անց, ինչպես տեղեկացանք, օրենքի ուժ ստացավ այն նախաձեռնությունը, որ երրորդ երեխան ունենալու դեպքում պետության կողմից հատկացվելու է մեկ միլիոն դրամ: Ուզում եմ իմանալ՝ մեր փոքրիկին ե՞ւս կհատկացվի: Հարսս չի աշխատում, երեխային հասանելիք որեւէ գումար դեռեւս չի ստացել. ե՞րբ կտրվեն նախատեսված պետական գումարները:

ՊԱՏԱՍԽԱՆ. Դիմումի կապակցությամբ հայտնում եմ, որ համաձայն ՀՀ կառավարության 2011թ. դեկտեմբերի 29-ի «2012 թվականի պետական նպաստների չափերը սահմանելու մասին»  N 1861-Ն որոշման՝ երեխայի ծննդյան միանվագ նպաuտի չափը սահմանված է 50 000 դրամ, իuկ ընտանիքում ծնված երրորդ, ինչպեu նաեւ հաջորդ յուրաքանչյուր երեխայի համար՝ 430 000 դրամ:
Համաձայն ՀՀ կառավարության 2012թ. հունիսի 14-ի «Հայաստանի Հանրապետության 2013-2015 թվականների պետական միջնաժամկետ ծախսերի ծրագիրը հաստատելու մասին» N740-Ն որոշման՝ 2014-2015թթ. նախատեսվում է 1-ին եւ 2-րդ երեխայի ծննդյան դեպքում միանվագ նպաստի չափը` 50 հզ. դրամ, երրորդ եւ չորրորդ երեխայի ծննդյան դեպքում միանվագ նպաստի չափը սահմանել 1 մլն դրամ, իսկ հինգ եւ ավելի երեխայի ծննդյան դեպքում` 1,5 մլն դրամ:

«ԺՈՂՈՎՈՒՐԴ». Մեր պատասխանատու պետական մարմիններից շատերը կարծես խոսքները մեկ են արել ու հարցերին պատասխանում են այնպես, որ մի լրացուցիչ հարց ու պատասխանի կարիք էլ լինի: Ամենազավեշտալին այն դեպքերում է, երբ հարցն ուղղակի «այո» կամ «ոչ» պատասխան է պահանջում (ինչպես եւ այս դեպքում), այնինչ դրանք այդպես էլ մնում են օդից կախված: Երեւի զուր չէ հիշեցնել մեր պատասխանատուներին, որ հարցերը հենց նրա համար են, որ ուղիղ պատասխաններ տրվեն: