ԱԺ անկախ պատգամավոր Գրիգորի Մարգարյանը (Բելաջիոյի Գրիշ) «Ժողովուրդ»-ի հետ զրույցում, անդրադառնալով օրերս հրապարակված սահմանադրական բարեփոխումների նախագծին, ասաց, որ իր համար այդ փաստաթղթում շատ անհասկանալի բաներ կան: «Ժողովուրդ»-ի հարցին, թե եթե հենց վաղը տեղի ունենար սահմանադրական բարեփոխումների հանրաքվեն, ինչպես կքվեարկեիք, պատգամավորն ասաց, թե առայժմ որեւէ պատասխան չունի:
-Պարո՛ն Մարգարյան, սահմանադրական բարեփոխումների նախագծով նախատեսված է անցում կատարել 100 տոկոս համամասնական ընտրակարգի: Դուք լինելով մեծամասնական ընտրակարգով ընտրված պատգամավոր՝ ինչպե՞ս եք վերաբերվում այդ փոփոխությանը:
-Եթե գլոբալ նայենք խնդրին, ապա մեծամասնական եւ համամասնական ընտրակարգերը ունեն ե՛ւ իրենց թերությունները, ե՛ւ առավելությունները, հիմա ես չեմ ցանկանում դրանց մասին խոսել: Համենայնդեպս, համամասնական ընտրակարգի գլխավոր թերությունն այն է, որ կապն ընտրողների եւ պատգամավորների միջեւ թուլանում ու կորում է: Ես լինելով 3 անգամ մեծամասնական ընտրակարգով ընտրված պատգամավոր, իհարկե, կողմնակից եմ, որ նաեւ լինի մեծամասնական ընտրակարգ, ինչպես հիմա է: Ամեն դեպքում ես կողմնակից չեմ, որպեսզի լինի կա՛մ համամասնական, կա՛մ մեծամասնական ընտրակարգ: Վերջապես եկեք նայենք մեր տարածաշրջանը, մեր երկիրը 70 տարի սովետական միության մեջ ապրած պետություն է, այսինքն՝ ժողովրդի մտածելակերպը, մենթալիտետը գրեթե նույնն է, ու ինձ թվում է, որ նման բաները փոխելիս պետք է տեսնել, թե տարածաշրջանում ինչ է կատարվում: Ես կարող եմ Ռուսաստանի օրինակը բերել, որ անցած խորհրդարանական ընտրությունների ժամանակ իրենք հրաժարվեցին մեծամասնական ընտրակարգից ու անցան միայն համամասնականին, բայց փաստորեն հիմա նորից են հրաժարվել համամասնականից: Ես չեմ որոշում՝ որն է ճիշտը, որը ոչ, բայց ես, լինելով մեծամասնական պատգամավոր, գտնում եմ, որ իմ ընտրողի հետ իմ կապը չեմ կորցրել ու չեմ կորցնի: Բայց ասեմ Ձեզ, որ ես կառչած չեմ իմ տեղից ու պատկերացնում եմ իմ կյանքը շատ հանգիստ, եթե մանդատ չունենամ, պատգամավոր լինել-չլինելու հետ կապված ես խնդիր չունեմ:
-Այսինքն՝ կարելի՞ է արձանագրել, որ Դուք դեմ եք, որպեսզի հաստատվի 100 տոկոս համամասնական ընտրակարգը:
-Այո՛, այո՛, որովհետեւ ինքն ունի իր թերությունները, բայց ես չեմ որոշողը, դա կորոշի ժողովուրդը, ինքը կհասկանա, թե ինչի համար է ասում այո, ինչի համար՝ ոչ:
-Ոչ վաղ անցյալում, երբ Դուք ԱԺ ԲՀԿ խմբակցության պատգամավոր էիք, ԲՀԿ-ն հայտարարում էր, որ 100 տոկոս համամասնական ընտրակարգին անցնելն ամենաճիշտ տարբերակն է, այդ ժամանակ ինչո՞ւ չէիք բարձրաձայնում Ձեր մտահագությունը, արդյո՞ք ընդդիմացել եք խմբակցությունում:
-Քանի որ ես կուսակցության անդամ չեմ եղել, իսկ նման տեսակետները կուսակցության ժողովների ժամանակ են քննարկվում, ուստի ես իմ տեսակետը չեմ ներկայացրել: Եթե բոլոր կուսակցությունների քարոզչական տեսակետին ծանոթանաք, կհասկանաք, որ բոլորն էլ մշտապես հայտարարել են, որ ճիշտ է 100 տոկոս համամասնական ընտրակարգը, բայց ես այդ առումով որեւէ բան չեմ կարող ասել, դա իրենց տեսակետն է:
-Իսկ այս ժամանակահատվածում ուսումնասիրել եք սահմանադրական բարեփոխումների նախագծի` ներկայացված 1-7 գլուխները, ինչ կարծիք ունեք առաջարկվող փոփոխությունների մասին, որքանո՞վ են դրանք այսօր անհրաժեշտ մեր երկրին եւ ժողովրդին:
-Խորապես շատ չեմ ուսումնասիրել, հիմնականում ուսումնասիրել եմ ընտրական մասը, ճիշտն ասած, նոր փոփոխություններով մեր ընտրական սիստեմը նմանեցնում եմ Լեհաստանին: Գտնում եմ, որ այդ առումով նորմալ սիտեմ է, ու մի քանի տասնյակ եվրոպական երկրներ Դոնթի ֆորմուլայով են առաջնորդվում: Բայց մի բան կա, որը ինձ համար պարզ չի, դա այն է, որ մեր ընտրությունները լինելու են երկու փուլով: Առաջին փուլում 101 պատգամավոր է ընտրվելու, ու արդեն երկրորդ փուլում 180-ի կարող է հասնել, եթե չեմ սխալվում հաշվարկներում: Ես ինչքան նայել եմ տարբեր երկրների ընտրական օրենքները, նմանատիպ բան չեմ կարողացել գտնել, համենայնդեպս, ամեն երկիր ստույգ իր թիվն ունի, թե քանի պատգամավոր է այդ երկրում լինում: Հիմա, ճիշտն ասած, ես նոր փոփոխությունում չկարողացա գտնել, թե երկրորդ փուլում ինչպես է լինելու: Դա ինձ համար պարզ չի, բայց հույս ունեմ, որ հետագայում ավելի կպարզեցվի եւ հասկանալի կդառնա, թե, օրինակ, ինչպես է լինելու ռեյտինգային պատգամավորը:
-Եթե սահմանադրական բարեփոխումների հանրաքվեն լիներ հենց վաղը, Դուք այո՞, թե՞ ոչ կասեիք:
-Ես էլի եմ կրկնում՝ դեռեւս բաներ կան, որ ինձ համար պարզ չեն, կարծում եմ՝ փոփոխություններն այնպիսին կլինեն, որ ես կասեմ այո, ինձ այդպես է թվում: Բայց կրկնում եմ՝ մինչեւ այս պահը ինչը ես ուսումնասիրել եմ, դա դեռ բավարար չէ:
ԼՂՀ-Ն ԿԱՐԵՎՈՐՈՒՄ Է ՆԱԽԱԳԱՀՆԵՐԻ ՀԱՆԴԻՊՈՒՄԸ
Նախօրեին ՀՀ-ում էին ԵԱՀԿ Մինսկի խմբի համանախագահները: Նրանք նախ հանդիպեցին Սերժ Սարգսյանի եւ Էդվարդ Նալբանդյանի հետ, ապա մեկնեցին Վիեննա` առաջիկա օրերին Բաքու այցելելու ծրագրով: Մինչ այդ, սակայն, ԱՄՆ համանախագահ Ջեյմս Ուորլիքը Երեւանում հրավիրած ասուլիսում փորձեց պարզաբանել «օկուպացված տարածքները վերադարձնելու» մասին ռուսական «Վեդոմոստի» գործակալությանը տված հարցազրույցում հնչեցրած հայտարարությունը: Նա եւս մեկ անգամ ընդգծեց, որ տարածքների վերադարձն ընդամենը համալիր կարգավորման մի տարրն է` կարեւորելով համապարփակ կարգավորումն ու այդ գործընթացում «Ստեփանակերտի իշխանությունների ձայնը»:
«Ղարաբաղյան հակամարտության համապարփակ կարգավորում չի կարող լինել, եթե դրանում ներառված չլինի Լեռնային Ղարաբաղի կարգավիճակի հարցը: Համապարփակ կարգավորումը ներառում է նաեւ կարգավիճակի հարցը, եւ այդ նպատակով անհրաժեշտ է Լեռնային Ղարաբաղի ժողովրդի կամքի ազատ արտահայտում՝ որպես համապարփակ այդ կարգավորման մի մաս»,-հայտարարեց համանախագահը:
«Ժողովուրդ»-ը զրուցել է ԼՂՀ նախագահ Բակո Սահակյանի մամլո խոսնակ Դավիթ Բաբայանի հետ՝ պարզելու համար՝ արդյո՞ք համանախագահները ցանկություն ունեցել են հանդիպելու ԼՂՀ նախագահի հետ ու, ընդհանրապես, ինչպես են ԼՂՀ իշխանությունները վերաբերվում Ուորլիքի հայտարարություններին:
-Համանախագահների այցելությունները հաճախակի են լինում, այս տարածաշրջանային այցի բուն նպատակը Հայաստանի Հանրապետության եւ Ադրբեջանի Հանրապետության նախագահների հանդիպման կազմակերպումն է: Այդ իսկ պատճառով, այսպես ասած, կարիք չկա, որպեսզի գան Արցախ, որովհետեւ հարցը վերաբերում է բուն Հայաստանին ու Ադրբեջանին:
-Եթե համանախագահներին հաջողվի կազմակերպել նման հանդիպում, ի՞նչ ակնկալիքներ կարող է ԼՂՀ-ն ունենալ, արդյո՞ք կարելի է սպասել որեւէ առաջընթացի:
-Սպասում ենք հանդիպումից, որ ինչ-որ ձեւով կնպաստի տարածաշրջանում կայունության եւ խաղաղության պահպանմանը: Սակայն ակնկալել ինչ-որ բեկում, հատկապես հաշվի առնելով Ադրբեջանի դեստրուկտիվ, վերին աստիճանի ապակայունացնող քաղաքականությունը՝ իրատեսական չէ: Ամեն դեպքում, կարծում ենք, որ ցանկացած հանդիպում շատ կարեւոր է, որովհետեւ դրանք նպաստում են խաղաղության եւ կայունության պահպանմանը:
-Իսկ ինչպես եք գնահատում Ջ. Ուորլիքի կողմից պարբերաբար արվող հայտարարությունները` «օկուպացված տարածքները Ադրբեջանին վրադարձնելու» մասին:
-Ես կարծում եմ, որ Ուորլիքը, լինելով փորձառու դիվանագետ, մեջբերում է կողմերի մոտեցումները ու ինքը գնահատակ չի տալիս: Քանի որ Ադրբեջանը տարածքները կոչում է օկուպացված, նա այդպես է ասում, իսկ ինչ վերաբերում է հայկական տերմինաբանությանը, ապա նույնը օգտագործում է հայկականը, որպեսզի հավասարակշռվածությունը պահպանի:
Նյութերը՝ ՍՈՆԱ ԳՐԻԳՈՐՅԱՆԻ
ՏՈՆՈՒՍՑԻՆԵՐԸ ԶԱՅՐԱՑԱԾ ԵՆ
«Տոնուս» շինարարական ընկերությունից տուժած բնակարանատերերը պատրաստվում են վաղը բողոքի ակցիա իրականացնել ՀՀ Կառավարության շենքի առջեւ: Տուժած բնակարանատերերը «Ժողովուրդ»-ին տեղեկացրին, որ բողոքի ակցիա իրականացնելու պատճառն այն է, որ «Արցախբանկ»-ի տնօրինությունը տարբեր պատճառաբանությամբ հետաձգում է Դավիթաշենի 2-րդ թաղամասի շենքերի շինարարությունը: Բնակարանատերերի խոսքերով՝ վերջին պատճառաբանությունը եղել է այն, որ բանկի ղեկավարությունը որոշել է Վ. Փափազյան հասցեի շենքերի հետ կապված խնդիրը կարգավորել, ապա նոր միայն սկսել Դավիթաշենի 2-րդ թաղամասի շինարարությունը: Սակայն բնակարանատերերն ու բանկի ղեկավարությունը նախապես նման պայմանավորվածություն չեն ունեցել:
ԳՅՈՒՂՆԱԽԱՐԱՐԻ ՓՈՂԵՐԸ
ՀՀ գյուղատնտեսության նախարար Սերգո Կարապետյանի դրամական միջոցները վերջին մեկ տարում կտրուկ ավելացել են: Նախարարի դրամական միջոցները, ըստ նրա՝ 2014 թվականի հայտարարագրի, անցած տարվա դրությամբ կազմել են 79 հազար 500 դոլար, 78 հազար 200 եվրո եւ 175 մլն դրամ: 2013 թվականի համեմատ 1 մլն 237 հազար դրամով ավելացել է նաեւ նրա աշխատավարձի չափը: Բացի այս՝ ՀՀ գլխավոր գյուղատնտեսը նախորդ տարվա ընթացքում 13 մլն դրամով վաճառել է «BMW X5 3.01» մակնիշի ավտոմեքենա: Գյուղատնտեսության նախարարի կնոջ՝ Նվարդ Հովակիմյանի դրամական միջոցները անցած տարվա դրությամբ կազմել են 20 մլն 500 հազար դրամ եւ 32 հազար 800 դոլար: Մինչդեռ նախարարի տիկինը տարեկան ստանում է ընդամենը 2 մլն 344 հազար դրամ աշխատավարձ: Հիշեցնենք, որ Սերգո Կարապետյանը, մինչեւ նախարար նշանակվելը, ղեկավարում էր «Արտաշատի պահածոների գործարան» ընկերությունը, որը հանրությանը հայտնի է «Արտֆուդ» ապրանքանիշով: Այս ընկերությունն, ինչպես հայտնի է, կապվում է ՀՀ վարչապետ Հովիկ Աբրահամյանի ընտանիքի հետ: Այլ կերպ ասած՝ Սերգո Կարապետյանը վարչապետի հետ հա՛մ Կառավարությունում է «փայ» մտել, հա՛մ էլ բիզնեսում:
«ՀՐԱԶԴԱՆԸ» ԿԱԼԱՆՔԻ ՏԱԿ
Ինչպես հայտնի է՝ «Հրազդան կենտրոնական մարզադաշտ» ՓԲԸ-ն սնանկ է ճանաչվել: Այս մասին դեռեւս հունիսին «Ժողովուրդ»-ի հետ զրույցում ասել էր ԱԺ պատգամավոր Աշոտ Աղաբաբյանը: Ու մինչ ընկերության սեփականատերերը փորձում են ստեղծված իրավիճակից դուրս գալու լուծումներ գտնել, նոր դատական հայցեր են ներկայացվում Ա. Աղաբաբյանի դեմ: Այս անգամ էլ «Ալֆա-Դելտա» ՍՊԸ-ն է դիմել Կենտրոն եւ Նորք-Մարաշ վարչական շրջանների ընդհանուր իրավասության դատարան՝ «Հրազդան» մարզադաշտից 8 մլն դրամ բռնագանձելու պահանջով: «Ալֆա-Դելտա» ՍՊԸ-ն միջնորդել է դատարանին արգելանք դնել «Հրազդան» մարզադաշտի գումարների եւ գույքի վրա: Դատավոր Արայիկ Մելքումյանը բավարարել է միջնորդությունը, եւ «Հրազդան կենտրոնական մարզադաշտ» ՓԲԸ-ի գույքի եւ դրամական միջոցների վրա արգելանք է դրվել:
.gif)
