Կրակոցներ Աբովյան փողոցի սրճարաններից մեկում

Հունվարի 23-ին, ժամը 23.10-ի սահմաններում, ոստիկանության քրեական հետախուզության գլխավոր վարչության  եւ Կենտրոնականի բաժնի ծառայողները Աբովյան փողոցում գտնվող մի  սրճարանից, խուլիգանություն կատարելու կասկածանքով, բերման են ենթարկել 1977 թ. ծնված Վաղինակ Ղ.-ին, 1973 թ. ծնված Արման Հ.-ին, 1990 թ. ծնված Գեւորգ Ե.-ին, 1978 թ. ծնված Արթուր Մ.-ին, 1977 թ. ծնված Մուշեղ Ա.-ին, 1982 թ. ծնված Արմեն Հ.-ին, 1985 թ. ծնված Միխայել Մ.-ին, 1975 թ. ծնված Արմեն Ղ.-ին, 1981 թ. ծնված Հրաչյա Ի.-ին, 1977 թ. ծնված Արթուր Ա.-ին, 1976 թ. ծնված Վահրամ  Հ.-ին, 1984 թ. ծնված Արտյոմ Ի.-ին եւ 1977 թ. ծնված Գարրի Մ.-ին:

Ոստիկանության լրատվության վարչությունից հայտնում են, որ բաժնում Գարրի Մ.-ի անձնական խուզարկությամբ հայտնաբերվել է “Մակարով” ատրճանակ` պահունակով` լիցքավորված 9 մմ տրամաչափի 6 փամփուշտով, իսկ Արթուր Ա.-ի մոտից` “Աուտո C 5” գազային ատրճանակ` 4 փամփուշտով:

Դեպքի վայր մեկնած օպերատիվ խումբը պարզել է, որ նույն օրը, ժամը 22.30-ի սահմաններում, Գարրի Մ.-ն իր   մոտ եղած ատրճանակից  սրճարանում 2 անգամ կրակել է: Դեպքի վայրի զննությամբ հայտնաբերվել է 1 պարկուճ:

Ատրճանակները եւ գտնված պարկուճն ուղարկվել են փորձաքննության: Գարրի Մ.-ն ձերբակալված է: Փաստի առթիվ ՀՀ քրեական օրենսգրքի  235 հոդվածի 1-ին մասի եւ 258 հոդվածի 1-ին մասի հատկանիշներով հարուցվել է քրեական գործ:

Կատարվում է նախաքննություն: