ԱԺ անկախ պատգամավոր Էդմոն Մարուքյանն երեկ հանդես էր եկել նախաձեռնությամբ, որով առաջարկում էր Ռուսաստանի ռազմավարական զարգացման ինստիտուտի գլխավոր տնօրեն Անդրանիկ Նիկողոսյանին զրկել ԱԺ բարձրագույն պարգև պատվո մեդալից: Նշենք, որ վերջինս կարծիք է հայտնել, թե Հայաստանը պետք է մտնի Ռուսաստանի կազմի մեջ:
Մարուքյանն Ազգային ժողովի նախագահին առաջարկել է Անդրանիկ Նիկողոսյանին զրկել 2013թ. հոկտեմբերին ստացած՝ ՀՀ ԱԺ բարձրագույն պարգև պատվո մեդալից: Նրան պարգևատրած գերատեսչություններից է նաև պաշտպանության նախարարությունը: Ինչպես այսօր հայտնել էր «Ժողովուրդ» օրաթերթը, Ա. Նիկողոսյանին ոչ միայն ԱԺ նախագահը և ոստիկանապետն են մեդալներ տվել, այլև ՀՀ ՊՆ Սեյրան Օհանյանը միանգամից երկու` «Անդրանիկ Օզանյան» և «Գարեգին Նժդեհ» մեդալով է պարգևատրել:
Ավելին, Armlur.am-ին հայտնի դարձավ, որ տարիներ առաջ նախարարության և Անդրանիկ Նիկողոսյանի հարաբերություններն այնքան մտերմիկ են եղել, որ ՊՆ-ն Նիկողոսյանին տարբեր պարգևներ է շնորհել: Սակայն ավելի հատկանշական է այն, որ որոշ ժամանակ անց բոլոր նվերները հետ են վերցվել, քանի որ նախարարության և Նիկողոսյանի հարաբերությունները կտրուկ վատացել են: Պատճառը, մեր տեղեկություններով, այն էր, որ Նիկողոսյանն իրեն սկսել էր վատ պահել: ՊՆ-ն էլ տեսնելով, որ բարի համբավ ձեռք բերած Անդրանիկ Նիկողոսյանը սկսել է ինչ-ինչ սխալ քայլեր անել, որոշում է պատժել նրան: Եվ արդեն մի քանի տարի է` նախարարությունն Անդրանիկ Նիկողոսյանի հետ որևէ կերպ չի համագործակցում կամ առնչվում:
Իսկ պատրաստվո՞ւմ է արդյոք ՊՆ-ն հետևել Էդմոն Մարուքյանի առաջարկին` հետ վերցնել Նիկողոսյանին տրված մեդալները, փորձեցինք պարզել հենց նախարարությունից: Մամուլի խոսնակ Արծրուն Հովհաննիսյանն Armlur.am-ի հարցին ի պատասխան հայտնեց, որ Ա. Նիկողոսյանին բավականին վաղուց տրվել է երկու մեդալ` սահմանամերձ գյուղերում կատարած բարեգործությունների և սահմանապահներին որոշակի աջակցություն ցուցաբերելու համար:
Նախարարությունը, սակայն, Արծրուն Հովհաննիսյանի փոխանցմամբ, ստեղծված իրավիճակում չի կարող տրված մեդալները հետ վերցնել, քանի որ օրենքով սահմանված նման ընթացակարգ չկա:
.gif)
