ԼԱՊՏԵՐԻ ԳՈՐԾՈՎ ԴԱՏԱՊԱՐՏՎԵՑԻՆ

Տավուշի մարզի ընդհանուր իրավասության դատարանի Բերդի նստավայրում (դատավոր՝ Զոյա Զաքինյան) ընթանում էր Արագածոտնի մարզի Հնաբերդ գյուղի բնակիչ, 1987թ. ծնված Հայկ Ներսիսյանի եւ Երեւանի բնակիչ, 1989թ. ծնված Վլադիմիր Խաչատրյանի դատավարությունը: Ավագ լեյտենանտ Հայկ Ներսիսյանին մեղադրանք էր առաջադրված, որ նա, լինելով պաշտպանական զորամասերից մեկի հակատանկային մարտկոցի դասակի հրամանատար, ստորադասության հարաբերությունների բացակայության դեպքում խախտել է զինծառայողների միջեւ փոխհարաբերությունների կանոնագրքային կանոնները եւ իրեն պատկանող լապտերը վերադարձնելու համար փոխադարձ կռվի մեջ մտել այդ մարտական դիրքում որպես դիրքի ավագի օգնական հերթապահության նշանակված լեյտենանտ Վլադիմիր Խաչատրյանի հետ, հայհոյել է նրան, ձեռքերով եւ ոտքերով հարվածներ հասցրել նրա մարմնի տարբեր մասերին՝ պատճառելով առողջության թեթեւ վնասի հատկանիշներ չպարունակող մարմնական վնասվածքներ: Իսկ լեյտենանտ Վլադիմիր Խաչատրյանին մեղադրանք էր առաջադրված, որ նա, լինելով ականանետային մարտկոցի դասակի հրամանատար, լապտերը վերադարձնելու կապակցությամբ կռվի բռնվելով Հայկ Նազարյանի հետ, հայհոյել, ձեռքերով եւ ոտքերով հարվածներ է հասցրել նրա մարմնի տարբեր մասերին, իսկ երբ Հայկ Ներսիսյանը դուրս է եկել գետնատնակից, Խաչատրյանն իր մոտ գտնվող ծալովի դանակով 2 անգամ հարվածել է Հ. Ներսիսյանի կրծքավանդակի ձախ կողմնային պատի եւ ձախ բազկի շրջանում՝ վերջինիս առողջությանը պատճառելով միջին ծանրության վնաս՝ առողջության տեւական քայքայումով: Վ. Խաչատրյանը կալանավորված էր, Հ. Ներսիսյանից ստորագրություն էր վերցվել չհեռանալու վերաբերյալ: Սույն գործով Հայկ Ներսիսյանին մեղադրանք էր առաջադրված ՀՀ քրեական օրենսգրքի 359-րդ հոդվածի (զինծառայողների միջեւ փոխհարաբերությունների կանոնագրքային կանոնները խախտելը նրանց միջեւ ստորադասության հարաբերությունների բացակայության դեպքում) 1-ին մասով (պատժվում է կալանքով՝ առավելագույնը 3 ամիս ժամկետով, կամ կարգապահական գումարտակում պահելով՝ առավելագույնը 2 տարի ժամկետով, կամ ազատազրկմամբ՝ առավելագույնը 2 տարի ժամկետով), իսկ Վ. Խաչատրյանին` 359-րդ հոդվածի 2-րդ մասի 3-րդ եւ չորրորդ կետերով (պատժվում է կարգապահական գումարտակում պահելով՝ 1-3 տարի ժամկետով, կամ ազատազրկմամբ՝ 1-5 տարի ժամկետով): Կայացավ արագացված դատաքննություն: Հունվարի 22-ին դատարանը Հայկ Ներսիսյանին դատապարտեց մեկ ամսվա կալանքի, իսկ Վլադիմիր Խաչատրյանին՝ մեկուկես տարվա ազատազրկման: