ԱԺ անկախ պատգամավոր Էդմոն Մարուքյանն երեկ հանդես էր եկել նախաձեռնությամբ, որով առաջարկում էր Ռուսաստանի ռազմավարական զարգացման ինստիտուտի գլխավոր տնօրեն Անդրանիկ Նիկողոսյանին զրկել ԱԺ բարձրագույն պարգև պատվո մեդալից: Նշենք, որ վերջինս կարծիք է հայտնել, թե Հայաստանը պետք է մտնի Ռուսաստանի կազմի մեջ:
Մարուքյանն Ազգային ժողովի նախագահին առաջարկել է Անդրանիկ Նիկողոսյանին զրկել 2013թ. հոկտեմբերին ստացած՝ ՀՀ ԱԺ բարձրագույն պարգև պատվո մեդալից: Նրան պարգևատրած գերատեսչություններից է նաև պաշտպանության նախարարությունը:
Ինչպես այսօր հայտնել էր «Ժողովուրդ» օրաթերթը, Ա. Նիկողոսյանին ոչ միայն ԱԺ նախագահը և ոստիկանապետն են մեդալներ տվել, այլև Պաշտպանության և Մշակույթի նախարարները, ինչպես նաև` Երևանի քաղաքապետարանը: Armlur.am-ն արդեն ներկայացրել էր Պաշտպանության նախարարության տեսակետը, այժմ կանդրադառնանք մյուս գերատեսչություններին:
Երևանի քաղաքապետարանի լրատվության բաժնի պետ Արթուր Գևորգյանը նշեց, որ այդ մասով որևէ բան չեն մեկնաբանում: Ազգային ժողովի հասարակայնության և լրատվության հետ կապերի բաժնի պետ Արսեն Բաբայանն էլ հայտնեց, որ խորհրդարանի ղեկավար Գալուստ Սահակյանը գտնվում է արձակուրդում և այս հարցին կարող են անդրադառնալ միայն նրա վերադարձից հետո:
Արձակուրդում է գտնվում նաև Մշակույթի նախարար Հասմիկ Պողոսյանը, սակայն նախարարության տեղեկատվության և հասարակայնության հետ կապերի վարչությունից մեզ տեղեկացրեցին, որ Նիկողոսյանին նախարարությունը պարգևատրել է 2009թ.-ին:
«Մշակույթի նախարարությունը 2009թ. Անդրանիկ Նիկողոսյանին պարգևատրել է ոսկե մեդալով` մշակույթի բնագավառում երիտասարդների ստեղծագործական ներուժի խթանման գործում ունեցած զգալի վաստակի համար: Գերատեսչական պարգևը տրամադրվել է իբրև խրախուսանք: Իսկ «Պետական պարգևների և պատվավոր կոչումների մասին ՀՀ օրենք» -ի համաձայն պարգևներից կարող են զրկվել միայն դատական կարգով», – փոխանցեցին նախարարությունից:
Մնում է սպասել, թե այլևս ինչ արձագանքներ կստանա անկախ պատգամավորի առաջարկը:
.gif)
