Ինչպես է տեղի ունեցել երկու երեխաների մահվան ելքով վրաերթը

ՀՀ քննչական կոմիտեի Երևանի քննչական վարչությունում ավարտվել է 2 մանկահասակ երեխայի մահվան պատճառ հանդիսացած երթեւեկության կանոնները խախտելու դեպքի առթիվ հարուցված քրեական գործի նախաքննությունը։

Ինչպես Armlur.am-ը տեղեկանում է քննչական կոմիտեի լրատվական ծառայությունից, նախաքննությամբ պարզվել եւ հիմնավորվել է, որ փետրվարի 19-ին՝ ժամը 11:30-ի սահմաններում, քաղաքացի Ռ.Ավետիսյանի վարած «Ֆոլկսվագեն» մակնիշի ավտոմեքենան ընթացել է Մարաշի Արմենակյան փողոցով դեպի Հերացու փողոց՝ շուրջ 40կմ/ժ արագությամբ։ Հասնելով Արմենակյան փողոցի թիվ 122 հասցեի մոտակայքին` թույլ է տվել «Ճանապարհային երթևեկության անվտանգության ապահովման մասին» ՀՀ օրենքի 23-րդ հոդվածի 3-րդ կետի, ՃԵԿ-ի 65-րդ, 66-րդ և 67-րդ կետերի պահանջներին հակասող գործողություններ, վրաերթի է ենթարկել իր ընթացագոտում, աջ մայթից շուրջ 20սմ հեռավորությամբ դեպի իր ուղղությամբ քայլող հետիոտն Անահիտ Կարապետյանին։ Այնուհետեւ՝ բարձրանալով մայթին` վրաերթի է ենթարկել Աննա Հարությունյանին և մանկասայլակի մեջ գտնվող, վերջինիս մանկահասակ 2 որդիներին, ապա ընդհարվել նույն հասցեի դիմաց գտնվող ցանկապատին։

Վրաերթի հետեւանքով ստացած մարմնական վնասվածքներից երկու երեխաները մահացել են, իսկ Աննա Հարությունյանին և Անահիտ Կարապետյանին պատճառվել կյանքին վտանգ սպառնացող ծանր մարմնական վնասվածքներ։

Մինչդատական վարույթում ձեռք բերված ապացույցների համակցությամբ՝ Ռազմիկ Ավետիսյանին մեղադրանք է առաջադրվել ՀՀ քրեական օրենսգրքի 242-րդ հոդվածի 3-րդ մասով:

Քրեական գործը՝ մեղադրական եզրակացությամբ ուղարկվել է նախաքննության օրինականության նկատմամբ հսկողություն իրականացնող դատախազին, մեղադրական եզրակացությունը հաստատվել է, եւ քրեական գործն ուղարկվել դատարան։