Օրեր առաջ վարչապետ Հովիկ Աբրահամյանը Բելառուսում Եվրասիական տնտեսական միության անդամ երկրների վարչապետների հանդիպման ժամանակ առաջարկել է, որ անդամ երկրների միջեւ ռազմավարական ապրանքների հարցում, անցնել ռուբլու հաշվարկին: Armlur.am-ի հետ զրույցում ԱԺ պատգամավոր Աշոտ Աղաբաբյանը կարծիք հայտնեց, որ այս պարագայում Հայաստանի տնտեսությունը վնասներ կկրի: «Պետք է այնպես անել, որ ժողովրդի համար լավ լինի: Միայն ռուբլիով շրջանառությունը վնասներ կպատճառի Հայաստանի տնտեսությանը: Ռուսաստան դոլար մուտք չի գործի, ինչն էլ իր հերթին կվնասի մեր տնտեսությանը»,- ասաց պատգամավորը:
Նա նշեց, որ ամեն դեպքում սա այնպիսի հարց է, որ պետք է ավելի մանրամասն քննարկի, նոր կարծիք հայտնի: Բայց ամեն դեպքում, ըստ պատգամավորի, եթե նման որոշում կայացվի, ապա դա դրական չի ազդի Հայաստանի տնտեսության վրա. «Մենք եթե ռուբլիով արտահանում իրականացնենք, մեզ մոտ խնդիրներ կլինեն»:
Աղաբաբյանը բացառեց այն տեսակետը, թե նման կերպ շարունակվելու դեպքում Հայաստանում էլ ազգային արժույթը` դրամը կարող է փոխարինվել ռուբլիով. «Ես չեմ ընդունում դա: Նման բան չի լինի: Պետք է այնպիսի որոշումներ կայացվեն, որոնք կբխեն ժողովրդի շահերից»:
Քրիստինա Աղալարյան
.gif)
