Այն, որ նախագահական քարոզարշավի փուլն ենք թեւակոխել, Գյումրիում նկատվեց միայն վերջին մեկ շաբաթվա ընթացքում, երբ մեկը մյուսի հետեւից գյումրեցիներին հիշեցին Սերժ Սարգսյանը, Րաֆֆի Հովհաննիսյանը, Հրանտ Բագրատյանը: Իսկ մինչ այդ Գյումրին կարծես թե նախընտրական գործընթացների կազմակերպիչների կողմից մոռացության էր մատնվել նաեւ քարոզչական պաստառների առումով, որոնք այդքան էլ շատ չեն ՀՀ երկրորդ քաղաքում: Այնուամենայնիվ, եղածներն էլ առավելապես Սերժ Սարգսյանինն են, ավելի քիչ` Րաֆֆի Հովհաննիսյանինը եւ հազվադեպ` Հրանտ Բագրատյանինը: Իսկ մյուս թեկնածուների գոյությունը հիշեցնող տեսանելի քարոզչանյութեր դժվար թե հնարավոր լինի գտնել քաղաքում: Չնայած եթե Սերժ Սարգսյանի թեկնածության մասին հիշեցնող պաստառները չլինեին էլ, բացը կլրացվեր ամեն քայլափոխի նրան քարոզող ու մարդկանց ցուցակագրող մանկավարժներով եւ ՀՀԿ-ական նվիրյալներով: Մանկավարժները, մոռանալով իրենց բուն առաքելությունը, պարտադրանքով կամ իրենց իսկ ցանկությամբ, տնետուն ընկած, անձնագրի տվյալներ են վերցնում՝ ուղղորդելով գյումրեցիներին դեպի ապահով Հայաստան: Քաղաքում շրջանառվող լուրերի համաձայն՝ դպրոցներում ծնողական ժողովներ են արվել, որոնց ընթացքում քարոզվել է ընտրել գործող նախագահին: Հորդորներ են եղել նաեւ պետական կառույցների աշխատողների, աշակերտների եւ ուսանողների հաշվին բազմամարդ հանրահավաք կազմակերպել, ինչն էլ իրականություն դարձավ փետրվարի 9-ին:
Ի դեպ, Սերժ Սարգսյանի քարոզչությունն իրականացվել էր նաեւ փետրվարի 9-ի նախօրեին, երբ ՀՀԿ-ական պատգամավոր Աշոտ Աղաբաբյանի հրավերով Գյումրու թատրոնում սունդուկյանցիների խաղը դիտելու եկած հանդիսատեսը ներկայացումից հետո ստիպված էր եղել լսել մի ամբողջ քարոզ` ՀՀԿ-ական պատգամավորի եւ անվանի դերասանների մասնակցությամբ: Այսօր արդեն քաղաքում լուրեր են շրջանառվում, թե վերջին 1-2 օրվա ընթացքում տարբեր ժամերի ինչ-որ մարդիկ են գնում գյումրեցիների բնակարաններ, ցուցակագրում մարդկանց ու Սերժ Սարգսյանի օգտին քվեարկելու համար որոշ թաղամասերում խոստանում 5000-ական, որոշներում՝ 10.000-ական դրամ տալ: Խոսակցությունների համաձայն՝ այս գործընթացն իրականացվում է Հանրապետական, «Բարգավաճ Հայաստան» եւ «Օրինաց երկիր» կուսակցությունների համատեղ ջանքերով:
Գյումրի
.gif)
