Սույն թվականի սեպտեմբերի 9-ին ՀՀ Գիտությունների ազգային ակադեմիայում տեղի ունեցավ աշխատաժողով` նվիրված ՀՀ-ում ասպիրանտական կրթության բարեփոխման խնդիրներին: Աշխատաժողովին ներկա էին ՀՀ ԳԱԱ նախագահ ակադեմիկոս Ռադիկ Մարտիրոսյանը, ՀՀ ԳԱԱ գիտակրթական միջազգային կենտրոնի (ԳԿՄԿ) տնօրեն Ալբերտ Սարգսյանը, ՀՀ բարձրագույն որակավորման հանձնաժողովի փոխնախագահ Ատոմ Մխիթարյանը, ՀՀ կրթության և գիտության նախարարության մասնագիտական կրթության քաղաքականության մշակման բաժնի պետ Էդգար Ալեքսանյանը, ՀՀ ԳԱԱ նախագահության անդամներ, ՀՀ ԳԱԱ գիտական կազմակերպությունների աշխատակիցներ, հյուրեր ԲՈՒՀ-երից:
Ներկաներին ողջունեց ՀՀ ԳԱԱ նախագահ ակադեմիկոս Ռադիկ Մարտիրոսյանը: Այնուհետեւ ՀՀ ԳԱԱ ԳԿՄԿ արտաքին կապերի բաժնի պետ Արուսյակ Հարությունյանը ներկայացրեց «ՎԵՐԻՏԱՍ՝ զալցբուրգյան սկզբունքների հիման վրա կրթության 3-րդ մակարդակի կառուցվածքային զարգացում» ԵՄ Տեմպուս դրամաշնորհային ծրագրի ընթացքը և ձեռք բերված արդյունքները: ՀՀ ԲՈՀ-ի փոխնախագահ Ատոմ Մխիթարյանը զեկուցեց ՀՀ աստիճանաշնորհման համակարգի բարեփոխումների մասին: Ասպիրանտուրայի ընդունելության և ուսուցման նոր կարգի նախագիծը ներկայացրեց ՀՀ կրթության և գիտության նախարարության մասնագիտական կրթության քաղաքականության մշակման բաժնի պետ Էդգար Ալեքսանյանը:
ՀՀ ԳԱԱ մոլեկուլային կենսաբանության ինստիտուտի տնօրեն Արսեն Առաքելյանը ներկայացրեց ասպիրանտական մասնագիտական կրթության ռազմավարական զարգացման ծրագիրը: Աշխատաժողովի վերջում ամփոփիչ խոսքով հանդես եկավ ՀՀ ԳԱԱ ասպիրանտուրայի բաժնի պետ Կարինե Բեգոյանը, ով պատասխանեց նաև գիտական քարտուղարներին հուզող ընթացիկ հարցերին: Աշխատաժողովն անցկացվեց «ՎԵՐԻՏԱՍ՝ զալցբուրգյան սկզբունքների հիման վրա կրթության 3-րդ մակարդակի կառուցվածքային զարգացում» ԵՄ Տեմպուս դրամաշնորհային ծրագրի շրջանակներում:
ՀՀ ԳԱԱ Տեղեկատվական-վերլուծական կենտրոն
.gif)
