Այսօր ԱԺ հայտարարությունների ժամին ելույթ ունեցավ ԱԺ փոխխոսնակ Էդուարդ Շարմազանովը, ով անդրադարձավ սահմանադրական բարեփոխումների գործընթացին, նշելով, որ այդ գործընթացի շուրջ առկա քաղաքական կոնսոլիդացիան այլևս անհերքելի փաստ է:
«Ուշագրավ է, որ քննարկումներին մասնակցել են ոչ միայն քաղաքական ուժերի ներկայացուցիչներ, այլեւ հասարակական լայն շրջանակներ, ինչը բնորոշ է մայր օրենքի քննարկմանը: Բնականաբար, եթե կան կողմնակիցներ, կլինեն նաև ընդդիմախոսներ: Այնուհանդերձ, տարակուսելի է, որ ընդդիմախոսների մեծ մասը գրեթե որևէ բովանդակային հակափաստարկ չի ներկայացնում և փաստաթուղթը քննադատելու փոխարեն հանդես է գալիս իշխանափոխության կոչերով», – նշեց նա, հավելելով, որ բոլոր ժողովրդավարական երկրներում իշխանափոխության հասնում են ընտրությունների միջոցով:
Անդրադառնալով սահմանին տիրող իրավիճակին, Շարմազանովը նշեց, որ Ադրբեջանը, մերժելով բանակցային գործընթացում առկա սկզբունքները և համանախագահ երկրների կոչերը, ամռան ընթացքում շարունակեց ապակայունացնել իրավիճակը հայ-ադրբեջանական սահմանին:
«Նման վարքագիծը անթույլատրելի է եւ դատապարտելի: Ավելին՝ այն պետք է արժանանա հասցեական քննադատության միջազգային հանրության կողմից: Այսօր Դուշանբեում տեղի ունեցած ՀԱՊԿ անդամ երկրների ղեկավարների հանդիպման շրջանակներում Հանրապետության Նախագահը նշել է. «Ադրբեջանական կողմի` իրավիճակը սրելու փորձերը միջազգային հանրության կողմից ադեկվատ արձագանքի բացակայության պայմաններում հղի են ողջ տարածաշրջանը ապակայունացնելու վտանգներով»,- հավելեց նա:
Նրա խոսքով, մինչ Ադրբեջանի իշխանություններն ապակայունացման փորձեր են կատարում, Արցախի ժողովուրդը ևս մեկ անգամ ապացուցեց, որ ինքն է իր ճակատագրի դարբինը: Նա որպես օրինակ բերեց Արցախի Հանրապետությունում տեղի ունեցած ՏԻՄ ընտրությունները, որոնք վերահաստատեցին Արցախի ինքնիշխան և ժողովրդավարական լինելու փաստը:
.gif)
