ՔՐԻՍՏԻՆԵ ՊԵՊԵԼՅԱՆԻ ԳՈՐԾԸՆԿԵՐՆԵՐԸ ԿՀԵՏԵՎԵ՞Ն ՆՐԱ ՕՐԻՆԱԿԻՆ

Ինչպես տեղեկացրել ենք՝ 4000-ից ավել քաղաքացիներ օրերս միացել են մեկ նախաձեռնության շուրջ. նրանք պահանջում են չեղյալ հայտարարել «Էրեբունի-Երեւան» տոնակատարության միջոցառումները եւ Երեւանի օրվա տոնակատարությունների բյուջեն ուղղել սահմանամերձ գյուղերին: Ավելի ուշ հայտնի դարձավ, որ «Էրեբունի-Երեւան 2797» միջոցառումների ծրագիրն ամբողջությամբ պատրաստ է: Երեւանի քաղաքապետարանի լրատվության հասարակայնության հետ կապերի վարչության պետ Արթուր Գեւորգյանը ArmLur.am-ին փոխանցել էր, որ միջոցառումները կայանալու են, եւ ծրագիրն էլ կհրապարակվի սեպտեմբերի 30-ին: Այս հայտարարությունից հետո, սակայն, համացանցում կրքերն ավելի թեժացան. հանրության մի ստվար զանգված չի դադարում պնդել, որ կարելի էր գոնե կրճատել տոնակատարության միջոցառումների համար արվող ծախսերը:

Եվ, ահա, իրադարձությունների այս ֆոնին երգչուհի Քրիստինե Պեպելյանը հայտարարեց, որ «Էրեբունի-Երեւան» տոնակատարություններից գոյացած իր ողջ հոնորարը պատրաստվում է փոխանցել Բաղանիսի գյուղապետարան: Նա նաեւ կոչ էր արել գործընկերներին` հանդես գալ նման նախաձեռնությամբ. «Դուք այսպես ե՛ւ չեք «վիրավորի» ձեր մայրաքաղաքին, ե՛ւ ինչ-որ չափով կօգնեք մեր սահմանամերձ բնակիչներին»,-«Ֆեյսբուք» սոցցանցի իր էջում գրել է երգչուհին:
«Ժողովուրդ»-ը շոու-բիզնեսի մի քանի ներկայացուցիչներից հետաքրքրվեց` ինչպես են վերաբերվում այս նախաձեռնությանը եւ արդյոք իրենք էլ կհետեւեն Քրիստինե Պեպելյանի օրինակին:
Երգիչ Արսեն Սաֆարյանը, ով մասնակցելու է «Էրեբունի-Երեւան» տոնակատարության միջոցառումների շրջանակում կազմակերպվող համերգին, մեզ հետ զրույցում նշեց, որ, իհարկե, Քրիստինեն լավ քայլ է արել, սակայն ինքն այդ մասին դեռ չի մտածել. «Ընդհանրապես, լավ եմ վերաբերվում նման նախաձեռնություններին, ուղղակի այնպես չէ, որ այսօր ՀՀ-ում համերգները «ծփում են», պետք է հարցը դիտարկել երկու կողմից: Մեզ մոտ երբ ինչ-որ նախաձեռնություն է մեկնարկում, բոլորը «ուռա» են կանչում եւ առաջ գնում, բայց պետք է ռեալ նայել հարցին, ի վերջո, ամեն մեկն այնպիսի որոշում է կայացնում, որը տվյալ պահին իրեն ձեռնտու է»,-ասաց նա:
Մենք նաեւ հարցրինք` ինչ է կարծում երգիչը` երբ սահմանին նման լարված իրավիճակ է, հայկական կողմը զոհեր ունի, արդյոք արժի մայրաքաղաքում տոն կազմակերպել. «Լավ, օքեյ, Նոր տարի էլ մի՛ արեք, ոչ մի բան մի՛ արեք, հա՞, եկեք, ոչ մի տոն չանենք… Եթե կան այնպիսի կազմակերպություններ, որոնք այդքան սրտացավ են ազգի համար, օքեյ, թող ամեն ամսվա աշխատավարձները փոխանցեն սահմանամերձ գյուղեր, կանե՞ն. չեն անի: Եվ հետո` շատ ավելի կարեւոր մարդիկ կան, որոնք պետք է մտածեն այդ մասին, քննարկեն հարցը` սկսած բյուջեի բաշխումից: Ես հեղինակ կատարող եմ. ես որոշող չեմ…Ես համաձայն եմ. թող բոլորը մտածեն ամբողջ Հայաստանի մասին…Հաջորդ տոնը ո՞րն է, թող բոլոր երգիչները Նոր տարվա հոնորարները փոխանցեն, կփոխանցե՞ն»,-բորբոքվեց երգիչը:
Ինչ վերաբերում է այն 4000 քաղաքացիներին, ովքեր միացել են նախաձեռնությանը, Ա. Սաֆարյանը նշեց. «Էդ 4000 հոգին վճարո՞ւմ են, թե՞ միայն ստորագրում են, հետո կարդում են` որ երգիչն ինչ է արել, որ սոցցանցերում քննադատեն…»:
Երգչուհի Ալլա Լեւոնյանն էլ մեզ հետ զրույցում տեղեկացրեց, որ տոնական օրերին քաղաքում չի լինելու, եւ, այնուամենայնիվ, նա ողջունեց Քրիստինեի քայլը. «Եթե մյուսներն էլ այդպիսի բան անեն, շատ ճիշտ կանեն»,-ասաց նա:
Երգչուհի Հասմիկ Կարապետյանը եւս գովելի համարեց Ք. Պեպելյանի նախաձեռնությունը, բայց միաժամանակ նկատեց. «Կարծում եմ, որ համերգից երգիչների ստացած գումարներն այդքան շատ, զգալի չեն լինի, լավ կլիներ, որ քաղաքապետն էլ մտածեր այդ մասին, պարոն Տարոն Մարգարյանն էլ կարող էր փոխանցում անել. դա էլ է տարբերակ, բայց, իհարկե, երգիչների կողմից էլ սահմանամերձ գյուղերին օգնելը շատ լավ քայլ կլինի»,-եզրափակեց նա:

ԱՆՆԱ ԲԱԲԱՋԱՆՅԱՆ

 
ԻՆՉՈ՞Ւ ՊԵՏՔ Է ԻՆՉ-ՈՐ ԼԱԿՈՏ ԳԱ…

«Ժողովուրդ»-ն արդեն տեղեկացրել է, որ այն բանից հետո, ինչ Կամերային երաժշտության ազգային կենտրոնի տնօրենի թափուր մնացած պաշտոնը հանձնվեց մշակույթի նախկին նախարար Հովիկ Հովեյանի որդուն` ալտահար Վաչե Հովեյանին, կենտրոնի համակարգում գործող կոլեկտիվները դժգոհություն էին հայտնել: Վաչե Հովեյանն ավելի վաղ մեզ խոստացել էր, որ թեմայի շուրջ մեկնաբանություն կտա: Եվ, ահա, կատարեց իր խոստումը:

-Պարո՛ն Հովեյան, Դուք տեղյա՞կ եք կոլեկտիվների` մշակույթի նախարարին ուղղված նամակից:
-Օրերս տեղեկացրին ինձ, ես շատ նորմալ եմ վերաբերվում այդ ամեն ինչին, կխոսենք բոլորի հետ առանձին-առանձին, կհասկանանք` ինչ խնդիրներ ունեն… Նորայր Նազարյանը լավ աշխատող է, աշխատում է մեզ մոտ եւ աշխատելու է: Բոլորն էլ ինչպես աշխատել են, այնպես էլ աշխատելու են, իմ խնդիրն է բարելավել նրանց աշխատանքային պայմանները:
-Կոլեկտիվի անդամները ցանկանում են տնօրենի պաշտոնում տեսնել Նորայր Նազարյանին, նրանց ինչո՞վ կարող եք շահագրգռել:
-Ես չեմ եկել ինչ-որ մեկին շահագրգռելու. ես եկել եմ աշխատելու: Սեպտեմբերի 28-ին արդեն իրենցից մեկը (անունը չեմ տա) առանձնազրույցի ընթացքում ասաց` ես հույս ունեմ, որ կփոշմանեմ իմ արածների համար: Կարծում եմ` համագործակցությունը բեղմնավոր կլինի:
-Նամակի ներքո ստորագրողները ուզում են` տնօրենը ներսի մարդ լինի, ոչ թե դրածո մեկը…
-Ամեն մարդ ունի իր ցանկությունները: Բոլոր ցանկությունները չեն, որ իրականանում են: Հանձնաժողովի ութ անդամներից ութը ինձ կողմ է քվեարկել, Նորայրի օգտին` վեցը կողմ, երկուսը` դեմ, ես ներկայացրել եմ համապատասխան դիմում մշակույթի նախարարին եւ նշանակվել եմ աշխատանքի օրենքի բոլոր տարրերին համապատասխան:
-Իսկ մշակույթի նախարարի հետ խոսե՞լ եք նամակի թեմայով:
-Դեռ չեմ խոսել, անպայման կխոսեմ:
Չնայած այս հավաստիացումներին՝ Երեւանի պետական կամերային երգչախմբի գեղարվեստական ղեկավար Հարություն Թոփիկյանը «Ժողովուրդ»-ին պատմեց, որ կոլեկտիվները սեպտեմբերի 28-ին հանդիպում են ունեցել նորանշանակ տնօրենի հետ եւ անչափ վիրավորված են նրա վերաբերմունքից. «Նա եկել էր անկարգ, արհամարհական, գողական կեցվածքով, կարծես արտադրամասում լիներ եւ խոսում էր բանվորների հետ: Զգացվում էր, որ կոնտակտ հաստատելու ոչ մի ցանկություն չունի: Ի դեպ, շատ լուրջ բախումներ եղան: Անձամբ ես շատ զայրացա, թողեցի, գնացի հանդիպումից: Նա քննարկում էր իր իրավասությունների մեջ չմտնող հարցեր»,-վրդովված պատմեց Թոփիկյանը: Նրա խոսքով` նման նսեմացուցիչ իրավիճակ կարող էր ստեղծվել միայն ցածրորակ, կլանային հարաբերություններում: «Կոլեկտիվից մեկը խիստ տոնով ասաց` բացառվում է, որ նրա հետ կաշխատի: Այնքան զայրացած ենք, որ նախարարությունը մեզ գցեց նման հիմար վիճակի մեջ: Ինչո՞ւ պետք է ինչ-որ լակոտ գա, իրեն այսպես պահի, ես հիմա նորից նախարարին եմ զանգում, որ խնդրեմ` բացառվի այդ մարդու հետ համագործակցությունը»,-եզրափակեց Թոփիկյանը:

Ա. ԲԱԲԱՋԱՆՅԱՆ