Հոկտեմբերի 12-ին Հ. Պարոնյանի անվան երաժշտական կոմեդիայի պետական թատրոնում կայացավ ՀՀ սփյուռքի նախարարության աջակցությամբ հրատարակված «Ազգային երգարան գրպանի» 21-հատորյա ժողովածուի շնորհանդեսը, որին ներկա էին ՀՀ սփյուռքի նախարար Հրանուշ Հակոբյանը, երգահաններ, արվեստագետներ, հյուրեր:
Ողջույնի խոսքով հանդես եկավ ՀՀ սփյուռքի նախարար Հրանուշ Հակոբյանը: Շնորհավորելով Ազգային երգարանի ստեղծման առթիվ՝ նախարարը բարձր գնահատեց ստեղծագործական խմբի, մասնավորապես ծրագրի հեղինակի՝ Սամվել Հարոյանի կատարած աշխատանքը և նշեց. «Ժողովածուն ներկայացնում է մեր ժողովրդի երաժշտական հարուստ պատմությունը: 659 երգից բաղկացած ընտրանի՝ հայ երգարվեստի բոլոր ժանրերի ընդգրկմամբ, հոգևոր երգեր՝ շարականներ, գանձեր, տաղեր, ժողովրդական՝ գեղջկական, աշուղա-գուսանական և քաղաքային ստեղծագործություններ, որոնք հայ ժողովրդի անցյալի, ներկայի, հիշողության, սիրո, տխրության, նրա ապրումների երաժշտական մարմնավորումն են: Մեզ հասած վիթխարի ժառանգություն, հրաշալի մեղեդիներ, որոնցում ամփոփված է հայկական ջերմ ու հարազատ աշխարհը, որը, վստահ եմ, հոգևոր կենսավիշ պիտի ներարկի Սփյուռքում ապրող մեր հայրենակիցներին և դառնա ամուր պատնեշ` ընդդեմ օտար անբարենպաստ ազդեցությունների: Վստահ եմ, որ «Ազգային երգարան. գրպանի» ժողովածուն կնպաստի երիտասարդության մեջ ազգային երգը սերմանելու հայանպաստ գործին: Ժողովածուն հայ ճշմարիտ երգը Հայաստանում և սփյուռքում տարածելու հրաշալի փորձ է»:
Օրհնության խոսքով հանդես եկավ Կոմիտաս վարդապետ Հովնանյանը՝ նշելով, որ Հայ երգարվեստի բարձրարժեք ու ճաշակավոր նմուշներից բաղկացած այս երգարանի ստեղծումը հայ ժողովրդի ճշմարիտ երգարվեստը նորովի է արժևորում:
Գնահատանքի խոսքով հանդես եկավ երգահան, ՀՀ ժողովրդական արտիստ Տիգրան Մանսուրյանը:
Նախաձեռնության հեղինակ, երգարանի խմբագիր Սամվել Հարոյանը շնորհակալություն հայտնեց ՀՀ սփյուռքի նախարարությանը, բոլոր այն կառույցներին, մասնագետներին, ստեղծագործական խմբին և անհատներին ովքեր աջակցել էին երգարանի ստեղծմանը:
Սիրված երգերի կատարումներով հանդես եկան Աննա Մայիլյանը, Թովմաս Պողոսյանը, Վարդան Բադալյանը, Անահիտ Սահակյանը, Համլետ Գևորգյանը, Արմեն Դարբինյանը, Լեյլա Սարիբեկյանը: Ելույթ ունեցան նաև «Սասուն» ազգագրական համույթը և «Բերդ» պարային համույթը:
.gif)
