Չինաստանը նախազգուշացրել է ԱՄՆ-ին Հարավչինական ծովում պատերազմ սկսելու ռիսկի մասին

Չինաստանի ռազմածովային ուժերի հրամանատար Ու Շենլին Հարավչինական ծովում Վաշինգտոնի գործողությունները «սադրանք» է անվանել, փոխանցում է РИА Новости-ն:

Չինացի ծովակալը նման հայտարարությամբ հանդես է եկել իր ամերիկացի գործընկեր ծովակալ Ջոն Ռիչարդսոնի հետ տեսակոնֆերանսի ընթացքում:

ԱՄՆ ներկայացուցիչն ավելի վաղ նշել էր, որ կողմերը բանակցություններ անցկացնելու շուրջ համաձայնության են եկել՝ տարածաշրջանում կոնֆլիկտային իրավիճակներից խուսափելու համար:

Չինաստանի ԱԳՆ-ն իր հերթին հայտնել էր, որ ամերիկյան Lassen էսմինեցը առանց Պեկինի թույլտվության ներխուժել է Հարավչինական ծով: Երկրի ԱԳՆ-ն հայտարարել է, որ ԱՄՆ-ի գործողությունները խախտում են Չինաստանի ինքնիշխանությունը:

Գործակալությունը հաղորդում է նաև, որ օպերացիայի փաստը հաստատել է Պենտագոնը: Պաշտպանության նախարար Էշթոն Քարթերի խոսքով՝ օպերացիան կանցկացվի նաև հետագայում, եթե համարեն, որ այն համապատասխանում է միջազգային իրավունքին:

Թարգմանիչ՝ Քրիստինե Պողոսյան