ԳՈՂՈՒԹՅՈՒՆՆԵՐԸ ՇԱՏԱՑԵԼ ԵՆ

Ոստիկանության Տավուշի մարզային վարչության պետի օպերատիվ գծով տեղակալ Արմեն Օհանյանը ներկայացրեց հերթական հանդիպման թեմաները՝ սեփականության պահպանություն, ժամկետային զինծառայությունից խուսափելու համար հետախուզման մեջ գտնվող, արտերկրում բնակվող մեր հայրենակիցների խնդիր: Պարոն Օհանյանն ասաց, որ  Իջեւանի տարածաշրջանում շատացել են գողության դեպքերը: Նա համայնքների ղեկավարներին հորդորեց բացատրական աշխատանք տանել խանութների տերերի հետ, որպեսզի  վերջիններս պահպանության հարցում ժլատություն չանեն եւ տեսաձայնային ազդանշանային  համակարգ գնեն: Նաեւ հավելեց, որ Իջեւանի թալանված ոսկու խանութում տեղադրված չեն եղել ո՛չ տեսախցիկներ, ո՛չ էլ ձայնային ազդանշանի համակարգ: Իսկ հանրակրթական դպրոցների տնօրեններին հորդորեց ավելի ուշադիր լինել դպրոցների գիշերային պահակների աշխատանքի վերահսկողության գործում:

Խորհրդակցության ժամանակ նշվեց, որ Տավուշում ժամկետային զինծառայությունից  խուսափելու համար շուրջ 300 հետախուզվող կա: Նրանց մոտ 40 տոկոսն այժմ 37 եւ ավելի տարեկան է, ուստի ազատվում է քրեական պատասխանատվությունից: Նրանցից շատերը Ռուսաստանի քաղաքացիություն ունեն, սակայն Հայաստանում նրանց նկատմամբ հարուցված քրեական գործերը փակված չեն: Համայնքների ղեկավարները պետք է աշխատանք կատարեն, որպեսզի դրանց վերաբերյալ գործերն օրենքով սահմանված կարգով  փաստաթղթային ձեւակերպում ստանան: Ժամկետային ծառայության տարիքային սահմանափակումը գերազանցած անձինք կարող են իրենց հանդեպ հետախուզումը դադարեցնելու նպատակով ՀՀ չգալ, բավական է հարազատներին կամ ընկերներին ուղարկել լիազորագիր` իրենց գործով զբաղվելու համար: 

Բաղանիսի գյուղապետ Նարեկ Սահակյանն անասնագողությունների խնդրի վերաբերյալ հարց ուղղեց: Ա. Օհանյանն ասաց, որ 2010թ. մարտին Կոթիում ադրբեջանցի 2 անասնագողերի ոչնչացումից հետո (սահմանը հատելիս սպանվել են սահմանապահների կողմից) Տավուշի սահմանագոտում այդ հանցագործությունները վերացել են: Վերջին տարիների միակ դեպքը եղել է 2012թ. Բաղանիսում: Իջեւանի տարածաշրջանի Այգեհովտի գյուղապետ Լեւոն Գրիգորյանը հայտնեց, որ սահմանամերձ գյուղի դպրոցը եւ մանկապարտեզը գտնվում են Բերդի տարածաշրջան տանող ճանապարհի եզրին: Այգեհովտի տարածքում վարորդներն արագ են երթեւեկում, գյուղում գրեթե օրումեջ վթարներ են լինում: Գյուղապետն ասաց, որ կարելի է Իջեւան քաղաքի Անկախության փողոցի նման ասֆալտից թումբեր պատրաստել` արագ  երթեւեկը կանխարգելելու համար: Պարոն Օհանյանը նկատեց, որ նման թմբերն անօրինական են, եւ հավելեց, որ իրենք պետավտոտեսչության ուշադրությունը կհրավիրեն Այգեհովտի տարածքում երթեւեկության արագության վերահսկողության խնդրի վրա: