Հանդիսատեսը տպավորված է Պենդերեցկու և Ստրավինսկու ստեղծագործություններով

Խաչատրյանի անվան 3-րդ միջազգային փառատոնը շարունակում է հանդիսատեսին պարգևել անկրկնելի երաժշտական երեկոներ՝ լի բացառիկ համերգային ծրագրերով։
Նոյեմբերի 7-ին կայացած համերգին Հայաստանի պետական երիտասարդական նվագախումբը՝ գեղարվեստական ղեկավար և գլխավոր դիրիժոր Սերգեյ Սմբատյանի ղեկավարությամբ, ներկայացրեց Քշիշտոֆ Պենդերեցկու Ադաջո Երրորդ սիմֆոնիայից, որը հայաստանյան պրեմիերա էր, ինչպես նաև՝ Իգոր Ստրավինսկու «Սրբազան գարուն» ստեղծագործությունը։

Համերգից հետո հանդիսատեսը, ներկայացնելով իր հույզերը, նշում էր, որ տպավորված է ստեղծագործություններով և կատարմամբ։

Ալտահար Մաքսիմ Նովիկովը նկատում է. «Մեծն Ստրավինսկին՝ Երևանում։ Դա ուղղակի հիանալի է։ Շնորհակալություն՝ Սերգեյ Սմբատյանին և փառատոնին, որ ներկայացրին այս ստեղծագործությունը»։

Հանդիսատեսի թվում էր նաև իտալացի դիրիժոր Ջանլուկա Մարչիանոն, ով ընդամենը օրեր անց հանդես է գալու փառատոնի շրջանակներում՝ ղեկավարելով Երիտասարդական նվագախումբը։ Խոսելով երեկոյի մասին՝ մաեստրոն ասաց, որ մեծ բավականություն է ստացել՝ լսելով համերգը. «Գեղեցիկ երեկո էր՝ լի հիանալի երաժշտությամբ»։

Դերենիկ Դեմիրճյանի տուն-թանգարանի վարիչ Կարինե Ռաֆայելյանն էլ ընդգծեց, որ իր համար ամեն անգամ Պենդերեցկու երաժշտությունը լսելն առանձնապես հաճելի է. «Հպարտություն եմ զգում, որ մենք թեկուզ դրսում, սակայն հայկական արմատներ ունեցող հզոր արվեստագետներ ունենք։ Այդ իմաստով առաջին՝ Պենդերեցկու ստեղծագործությունը ոչ միայն էսթետիկական հաճույք պատճառեց, այլև շոյեց փառասիրությունս։ Ստրավինսկու ստեղծագործությունը լսելիս պատկերացրի, որ շատ գեղեցիկ բալետ կլինի։ Կուզենայի բալետն էլ տեսնել։ Իսկ Երիտասարդական նվագախումբն ինձ հայտնի կոլեկտիվ է, և շատ ուրախ եմ, որ այդպիսի երիտասարդներ ունենք»։

Նույն օրը՝ նոյեմբերիի 7-ին, Խաչատրյանի անվան փառատոնի շրջանակներում Սպենդիարյանի անվան օպերայի և բալետի ազգային ակադեմիական թատրոնում ներկայացվեց նաև Արամ Խաչատրյանի «Գայանե» բալետը՝ 3 գործողությամբ։
Նշենք, որ խաչատրյանական փառատոնն անցկացվում է ՀՀ Նախագահի հովանու ներքո։ Փառատոնի կազմակերպիչն է Հայաստանի պետական երիտասարդական նվագախումբը (գլխավոր գործընկեր՝ ՎիվաՍելլ-ՄՏՍ)։ Փառատոնի աջակիցն է ՀՀ մշակույթի նախարարությունը, գործընկերները՝ «Փյունիկ» բարեգործական հիմնադրամը, «Լուդինգ», «Ջերմուկ գրուպ» ընկերությունները, «Անի պլազա» հյուրանոցը։