Ես հոգով անչափահաս եմ. Վլադիմիր Բարխոյան (ֆոտո)

Երգիչ Վլադիմիր Բարխոյանը տեւական ժամանակ էստրադային ժանրում հանդես չի գա: Նա որոշել է ուժերը փորձել դասական վոկալում: Երգիչը մասնագիտությամբ հենց դասական վոկալիստ է, ուստի նա, այսպես ասած, կվերադառնա իր արմատներին:
Վլադիմիրը «Ժողովուրդ»-ին տեղեկացրեց, որ պատրաստվում է հաջորդ տարի մասնակցել Իտալիայում կայանալիք միջազգային մրցույթի եւ առաջին անգամ ուժերը փորձել դասական ժանրում: «Ես մրցույթներ չեմ սիրում, բայց այս անգամ ինքս ինձ հակառակվելով` գնալու եմ այդ քայլին: Մեկ ամսից արդեն կսկսեմ պատրաստվել, երգեր ընտրել, փորձեր անել: Ես մի քիչ փոփոխական անձնավորություն եմ. հնարավոր է` տարիներ շարունակ նույն հունով ընթանամ, մեկ էլ հանկարծ փոխեմ հունս»,- ասաց նա:

Վլադմիրը, սակայն, շեշտեց` այնպես չէ, որ իրեն էստրադային ժանրում այլեւս չենք տեսնի. պարզապես մոտ ժամանակներում դա չի լինի:
Մեր այն դիտարկմանը, թե դասական երաժշտությունը Հայաստանում ավելի քիչ եկամուտ է բերում արտիստին, քան էստրադայինը, երգիչը պատասխանեց. «Ես երգարվեստում գումար աշխատելու համար չեմ քայլեր անում: Երգն իմ էությունն է, եւ ես միշտ իմացել եմ, որ դրա միջոցով հնարավոր չէ մեծ գումարներ աշխատել: Իսկ գումարի հարցը լուծում եմ այլ բնագավառներում աշխատելով»:

Մենք մի փոքր զրուցեցինք նաեւ Վլադմիրի անձնական կյանքից` հիշելով ավելի վաղ իր արած անկեղծ խոստովանությունը. նա նշել էր, որ երգ է գրել իր սիրո տխուր պատմության մասին, Վլադմիրին եւ իր սիրելիին բաժանել էր հեռավորությունը: Մենք հարցրինք` արդյոք կյանքի այս փուլում երգիչն ունի ոգեշնչման աղբյուր. «Այո՛, ունեմ, հուսանք` ամեն բան լավ կլինի: Ես ոչ մի արհեստական քայլ չեմ անում, թողնում եմ` կյանքն ինձ իր հունով տանի»: «Այսինքն` ժամանակը Ձեզ չի՞ «սպառնում»` հուշելով, որ հարկ է ամուսնանալ»-հարցրինք մենք, ինչին Վլադմիրը ծիծաղելով պատասխանեց. «Բացարձակ, կարելի է ասել` ես հոգով անչափահաս եմ»:

Աննա Բաբաջանյան