Ապրիլի 16-ին ԱԺ տարածքային կառավարման եւ տեղական ինքնակառավարման հարցերի մշտական հանձնաժողովի նախագահ Ստեփան Մարգարյանը եւ հանձնաժողովի փոխնախագահ Արաիկ Հովհաննիսյանը հանդիպեցին “Համալսարանական կրթությամբ կանանց ասոցիացիայի” եւ տեղական ինքնակառավարման մարմինների՝ քաղաքային ու գյուղական համայնքների ղեկավար եւ ավագանու անդամ կանանց հետ:
“Համալսարանական կրթությամբ կանանց ասոցիացիայի” ղեկավար Ջեմմա Հասրաթյանը տեղեկացրեց, որ ՄԱԿ-ի եւ ԵՄ-ի աջակցությամբ հանրապետության մարզերում իրականացվում են ծրագրեր, որոնք նպատակ ունեն աջակցել տեղական ինքնակառավարման մարմինների գործունեության արդյունավետության մեծացմանն ու զարգացմանը եւ կանանց ներուժի օգտագործմանը: Նրա խոսքով՝ թեեւ այս տարի 2 տոկոսով ավելացել է կանանց թիվը տեղական ինքնակառավարման մարմիններում, սակայն Հայաստանը պարտավորություն է ստանձնել՝ մինչեւ 2018 թվականը կանանց թիվը ավագանիների ղեկավարների կազմում հասցնելու մինչեւ 10 տոկոսի:
Հանդիպման մասնակիցներն անդրադարձան նաեւ համայնքային այլ խնդիրների եւ հարցերի, ներկայացրին դրանց լուծման իրենց առաջարկները: Որպես խնդիրների լուծման նախապայման կանայք օրենսդիրներին առաջարկում են մեծացնել կանանց ներգրավվածությունը տեղական ինքնակառավարման մարմիններում, ինչպես նաեւ բարձրացնել ավագանիների գործունեության թափանցիկությունն ու անկախությունը:
Հանձնաժողովի նախագահը եւ փոխնախագահը պատրաստակամություն հայտնեցին քննարկել առաջարկները եւ հնարավորության սահմաններում նպաստել հարցերի կարգավորմանը՝ խուսափելով արհեստական միջամտություններից: Անդրադառնալով տեղական ինքնակառավարման մարմիններում կանանց ներգրավվածության խնդրին, Ստեփան Մարգարյանը եւ Արաիկ Հովհաննիսյանը կարեւորեցին հասարակության մեջ տիրող կարծրատիպերի վերացումն ու տեղական ինքնակառավարման մարմինների աշխատանքի լուսաբանման ավելացումը, երկու սեռերի ներկայացուցիչների համար հավասար մրցակցային պայմանների ապահովումը:
Նույն օրը “Համալսարանական կրթությամբ կանանց ասոցիացիայի” եւ տեղական ինքնակառավարման մարմինների՝ քաղաքային եւ գյուղական համայնքների ղեկավար եւ ավագանու անդամ կանանց հանդիպեց նաեւ ԱԺ մարդու իրավունքների պաշտպանության եւ հանրային հարցերի մշտական հանձնաժողովի նախագահ Էլինար Վարդանյանը:
Կանանց խնդրանքով հանձնաժողովի նախագահը ներկայացրեց հանձնաժողովի գործունեության ոլորտները՝ մասնավորապես անդրադառնալով կանանց իրավունքների վերաբերյալ հարցերին:
Համայնքների ավագանիների կին անդամներն անդրադարձան համայնքներում առկա բազմազան խնդիրներին, ծանոթացան միմյանց հոգսերին եւ ձեռքբերումներին, ներկայացրեցին առաջարկներ, որոնց հիման վրա, ինչպես նշեց տիկին Վարդանյանը, կմշակվեն օրենսդրական նախագծեր:
.gif)
