Նոր մանրամասներ «զինված հանցախմբի» անդամների մասին. ովքեր են նրանք (ֆոտո)

Նոյեմբերի 25-ին տեղի ունեցած զինված խմբի վնասազերծումից հետո  ձերբակալված, ապա կալանավորված 21 անդամների ամբողջական ցանկը շարունակում է անհայտ մնալ: Երեկ միայն պարզ դարձավ, որ նոյեմբերի 25-ին ձերբակալվել է նաև ազատամարտիկ Էդուարդ Ներսիսյանը, ով ավելի շատ հայտնի է Ապար անունով: Ի վերջո, փորձենք ի մի բերե, թե 21 անդամներից քանիսի մասին են տեղեկություններ հայտնի:

Արթուր Վարդանյանը համարվում է զինված խմբի պարագլուխը: Armlur.am-ը պարզել էր, որ նա «Հայոց վահան» նախաձեռնության ղեկավարն է։ Արթուրի հայրն Արցախյան ազատամարտի մասնակից է և մահացել է պատերազմական գործողությունների ժամանակ:

Նելի Մինասյանն ակտիվիստ է, ով մասնակցել է  Բաղրամյան փողոցում տեղի ունեցած էլեկտրաէներգիայի թանկացման դեմ ցույցերին։ Նա  22 տարեկան է, Սյունիքի մարզի Հարթաշեն գյուղի բնակչուհի է, սովորում է Գլաձոր համալսարանում:

Արման Հայրապետյանը  Հ1-ի աշխատակից է եղել և հեռուստաընկերությունից հաստատել են այդ մասին:

Ավետիս Բարեյանն Արմավիր մարզի Արևիկ համայնքի բնակիչ է: Նույն համայնքի բնակիչներ են նաև Վաղինակ Ստեփանյանն ու Արթուր Եղիազարյանը: Նրանք երեքն էլ ամուսնացած են:

Տիգան Բոյաջյանը  19 տարեկան է, Շիրակի մարզի Փանիկ համայնքից է: Վերջերս հաճախ էր մասնակցում «Հիմնադիր խորհրդարան»-ի կազմակերպած ակցիաներին: Նրա հայրը ևս Արցախի հերոսամարտի մասնակից է:  Նույն համայնքից է նաև Գևորգ Ջնդոյանն է, ով վերջերս հացադուլ է արել:

 Հայր Անտոնիո Ծայրագույն վարդապետ Թոթոնջյանը «Ռադիո Մարիամ Հայաստան» ռադիոկայանի տնօրենն է, ով  ԱԱԾ է տարվել  նոյեմբերի 26-ին:

Նրա հետ միասին ԱԱԾ էր տարվել նաև Լիլիթ Թորոսյանը:  Վերջինս ռադիոընկերության եթերում հարցազրույց էր անցկացրել Արթուր Վարդանյանի հետ:

Կալանավորվածնեի թվում են նաև Մարինե և Ասյա քույրերը, ովքեր բնակվել են Նուբարաշենում։

Ազատամարտիկ Խաչիկ Ավետիսյանի մասին հայտնել էինք: Նա նախկինում աշխատել էր ՊՆ-ում, սակայն վերջինիս ավելի քան 10 մլն դրամ է պարտք եղել և կալանավորվել, ապա համաներմամբ ազատ արձակվել:

Ապար մականունով ազատամարտիկին կարելի էր հանդիպել տարբեր ակցիաների ժամանակ:

Կան նաև Սրբուհի և Դավիթ անունով կալանավորվածներ, որոնց մասին դեռևս տեղեկություններ չկան:

Նոյեմբերի 25-ին ձերբակալված 21 անդամներից հայտնի են այսքանի տվյալները, մյուսներինը խնամքով թաքցվում են, սակայն ակնհայտ է, որ դեռևս հետաքրքիր բացահայտումներ են սպասվում: