Պարզվում է, որ ՀՀ Արագածոտնի մարզի Ափնա համայնքի բնակիչների մի մասը՝ 68 հոգի, 2012թ. խորհրդարանական եւ այս տարվա նախագահական ընտրություններից առաջ գրանցվել են Երեւանում դրանց մասնակցելու համար: Այս մասին «Ժողովուրդ»-ին տեղեկացրեց համայնքի ղեկավար Ռոբերտ Կարապետյանը: «Գնում են: Մի մասը Երեւան, մյուս մասը՝ Ռուսաստանի Դաշնություն: Էս Ազգային ժողովի ընտրության ժամանակ 68 հոգի գրանցումից դուրս եկան: Մի մասը դուրս են եկել մշտական գրանցման նպատակով, իսկ մյուս մասը՝ մոտ քսան հոգի, գնացին, քաղաքում ընտրություն արեցին, հետո նորից եկան, հետ գրանցվեցին: Ամեն մեկն իր բարեկամի տան վրա է գրանցվում: Մարդը գնացել, քաղաքում է ապրում, բայց հաշվառված է գյուղում, իսկ բնակչության թվաքանակը ես ավել եմ տալիս»,-ներկայացրեց գյուղապետը: Նրա խոսքով՝ գյուղի գրանցումից դուրս գալը մեկ օր է տեւում. «Բարեկամի տան սեփականության վկայականը տիրոջ հետ բերում են անձնագրային ծառայություն եւ գրանցվում»: Անկուսակցական գյուղապետից տեղեկացանք նաեւ, որ Երեւանում աշխատողներից նրանց ղեկավարները պահանջել էին գրանցվել քաղաքում:
.gif)
