Դեռևս նոյեմբերին լուրեր էին պտտվում, որ «Արարատի» գլխավոր մարզիչ Վարուժան Սուքիասյանը համարվում է Հայաստանի ֆուտբոլի ազգային հավաքականը գլխավորելու հիմնական թեկնածուներից մեկը:
Հարցազրույցներից մեկի ժամանակ Վարուժան Սուքիասյանը չէր բացառել իր թեկնածությունը առաջադրելու հանգամանքը և ընդգծել, որ հնարավոր է համատեղել աշխատանքը.
«Կարելի է համատեղել: Ես չգիտեմ, մինչև հստակ բան չլինի, չեմ կարող պատասխանել հարցերին: Ամեն դեպքում, պարտադիր չէ «Արարատը» թողնել, բայց մեր ազգի համար ամեն ինչ էլ կարելի է անել»:
Այսօր ՀՖՖ նախագահը Գործադիր կոմիտեին ներկայացրեց Երևանի «Արարատի» գլխավոր մարզիչ Վարուժան Սուքիասյանի թեկնածությունը: Վարուժան Սուքիասյանը հանդես եկավ Հայաստանի ազգային հավաքականի գլխավոր մարզչի պաշտոնում իր ծրագրային մոտեցումներով, ինչպես նաև հանգամանորեն պատասխանեց Գործադիր կոմիտեի անդամների հարցերին: Գործադիր կոմիտեի միաձայն որոշմամբ Վարուժան Սուքիասյանը նշանակվեց Հայաստանի ազգային հավաքականի գլխավոր մարզչի պաշտոնում:
Ինչ գործունեություն է ծավալել մինչ այսօր
Վարուժան Սուքիասյանը ծնվել է 1956 թվականի օգոստոսի 5-ին Երևանում: Նա զբաղեցրել է Երևանի քաղաքապետարանի «Բնակչության հատուկ սպասարկում» ՓԲԸ-ի տնօրենի պաշտոնը։ 1978-1987 թվականներին խաղացել է Կոտայք ֆուտբոլային ակումբում, 2015 թվականի ապրիլի 28-ից Արարատ ֆուտբոլային ակումբի մարզիչ։ Ֆուտբոլիստ Երվանդ Սուքիասյանի եղբայրն է։ Ֆուտբոյի Հայաստանի ազգային ու երիտասարդրական հավաքականների նախկին գլխավոր մարզիչ, ապա Երևանի «Արարատի» գլխավոր մարզիչ վերանշանակված մեր հանրապետության ամենափորձառու մասնագետներից մեկը՝ Վարուժան Սուքիասյանը Հայաստանի տարբեր ակումբերում մեծ հաջողությամբ է աշխատել ու մեծ նվաճումների հասել:
Ճանաչված մասնագետ է, ով 5 տարի էր՝ հեռացել էր մեծ ֆուտբոլից: Մի առիթով պատասխանելով լրագրողների հարցին, հայտնել է, որ ֆուտբոլ է վերադարձել ՀՖՖ նախագահ Ռուբեն Հայրապետյանի՞ հորդորով, մարզիչը պատասխանել է, թե «Արարատի» հետ կնքած իր աշխատանքային պայմանագիրը երկարաժամկետ է ՝ 5 տարով, ու որ ակումբի հեռանկարների հետ կապված իր ծրագրերն էլ երկաժամակետ են:
Նշենք նաև, որ Վարուժան Սուքիասյանն արդեն գլխավորել է Հայաստանի հավաքականը 2000-2001 թվականներին: Նա նաև մարզել է Հայաստանի երիտասարդական հավաքականը 1998-1999 և 2007-2008 թվականներին:
Հայաստանի բարձրագույն խմբի առաջնության ընթացիկ մրցաշրջանում «Արարատը» նրա ղեկավարությամբ 13 խաղերից հետո, ինչպես «Շիրակն» ու «Գանձասար-Կապանը», վաստակել է 21 միավոր:
Թե որքանով կարդարացվեն Վարուժան Սուքիասյանի հետ կապվող հույսերը, ցույց կտա ժամանակը, այնուամենայնիվ պետք է հիշեցնել, որ հայկական ֆուտբոլը, մեղմ ասած, «բարվոք» վիճակում չի գտնվում: Իսկ վերջին իրադարձությունները՝ կապված հավաքականի ներսում տիրող լարված մթնոլորտի հետ, է՛լ ավելի են սրել վիճակը:
Վարուժան Սուքիասյանն ըստ երևույթին անելիքներ շատ ունի:
.gif)
