Որքան գումար է անհրաժեշտ տոնական օրերը Երևանից դուրս անցկացնելու համար

Armlur.am-ն արդեն հայտնել էր, թե որքան գումար է անհրաժեշտ Ամանորի գիշերը երևանյան ռեստորաններում անցկացնելու համար:  Այսօր կներկայացնենք, թե որքան գումար է անհրաժեշտ տոնական օրերը Երևանից դուրս անցկացնելու համար:

Հայաստանում գտնվող  հանգստյան տները և հյուրանոցներն արդեն ամանորյա փաթեթներ ունեն, որն իր մեջ ներառում է ամանորյա միջոցառում, երեքանգամյա սնունդ, հետաքրքիր ժամանց: Այժմ տեսնենք, թե որքան գումար է անհրաժեշտ այդ ամենը վայելելու համար:

Օրինակ, Ծաղկաձորում գտնվող «Մարիոթ» հյուրանոցը ոչ միայն փաթեթներ և առաջարկներ ունի դեկտեմբերի 31-ից սկսած, այլ նաև մինչև այդ օրը: Այս հյուրանոցը դեկտեմբերի 25-27-ն առաջարկում է 2 անձի համար նախատեսված տոնական ընթրիք, որն արժե 125 հազար դրամ: Սա իր մեջ ներառում է նախաճաշ, ընթրիք և երկու օր հաճելի ժամանց:

Իսկ Ծաղկաձորում գտնվող այլ հյուրանոցները բազմապիսի փաթեթներ ունեն դեկտեմբերի 31-ից  հունվարի 6-ն ընկած ժամանակահատվածի համար: Գումարը սկսվում է 2 անձի համար 300 հազար դրամից և կարող է հասնել մինչև 1 մլն դրամ, որը կախված է  առաջարկվող ծառայություններից և ամանորյա շոու-ծրագրերից:

Հետաքրքիր առաջարկներ ունի նաև Ջերմուկում գտնվող հանգստյան տներն ու հյուրատները: Օրինակ,  «Վերոնա» հանգստյան տան առաջարկած փաթեթն իր մեջ ներառում է Ամանորյա բանկետ,  Սուրբ Ծննդյան միջոցառում,  նվերներ, երեքանգամյա սնունդ: Այստեղ դեկտեմբերի 31-ից հունվարի 4-ը մեկ անձի համար ծառայություններն արժեն 145 հազար դրամ, իսկ դեկտեմբերի 31-ից հունվարի 6-ը մեկ անձի համար՝ 200 հազար դրամ: