ArmLur.am-ն արդեն հայտնել է, որ «Նոր Հայաստան» հանրային փրկության ճակատի «Ընդդիմության միասնական շտաբ»-ի տարածած հաղորդագրության համաձայն՝ հունվարի 5-ին՝ ժամը 19-ի սահմաններում, միջին տարիքի երկու ամրակազմ տղամարդիկ դարանակալել են «Նոր Հայաստան» ճակատի աջակից, ռուսաստանաբնակ Սյուզի Գևորգյանին, հետապնդել են նրան, այնուհետև՝ վրա հասնելով գետին են տապալել և ոտքերով բազմաթիվ հարվածներ են հասցրել նրա գլխին, դեմքին և մարմնի տարբեր մասերին՝ պատճառելով մարմնական վնասվածքներ:
Երիտասարդ աղջնակի վրա հարձակվողները հեռացել են միայն այն ժամանակ, երբ նրա օգնության կանչերի վրա մարդիկ սկսել են մոտենալ: Հարվածներ հասցնելու ժամանակ հարձակվողներն ասել են, թե քեզ ասացինք, որ հեռու մնաս, ինչու չլսեցիր: Սյուզի Գևորգյանն այն արտերկրաբնակ երիտասարդներից մեկն է, որ Հայաստան է ժամանել հանրաքվեի ընթացքում «Ոչ»-ին աջակցելու համար և շարունակում է պայքարը հանրաքվեի արդյունքների կեղծման դեմ:
Այս առիթով «Հայկական Վերածնունդ» կազմակերպությունը հաղորդագրություն է տարածել, որով դատապարտում է Ս. Գևորգյանի քաղաքական հետապնդումը: Հաղորդագրության մեջ ասվում է. «Հունվարի 5-ին, Երևան քաղաքում դաժանորեն ծեծի է ենթարկվել Նոր Հայաստան Ճակատի ակտիվ աջակից, ռուսաստանաբնակ երիտասարդ Սյուզի Գևորգյանը՝ նրան պատճառելով ուղեղի ցնցում և զգալի մարմնական վնասվածքներ: Հանցագործությունը իրականացրել են երկու տղամարդ, որոնց իսկ հաղորդմամբ ծեծի պատճառը եղել է Սյուզի Գևորգյանի ընդդիմադիր պայքարից հրաժարվելու նախկինում նրանց հնչեցրած պահանջները չկատարելը:
Սա Սյուզի Գևորգյանի նկատմամբ քաղաքական ենթատեքստով բռնության երկրորդ դեպքն է, իսկ նրա հասցեին սպառնալիքներ հնչել են պարբերաբար: Ինչպես և ակնկալվում էր, թե առաջին և թե վերջին դեպքում բռնությունն իրականացնողները չեն բացահայտվել և չեն պատժվել: Այսպիսով՝ հայաստանյան իրականությունում ավելացավ ռեժիմի կողմից իրականացվող քաղաքական հետապնդումների և հաշվեհարդարի ևս մեկ վառ օրինակ: Այս անգամ այն ընդգծված է այն հանգամանքով, որ բռնության զոհը կին է և սփյուռքահայ: Հայաստան տեղափոխվելուց առաջ Սյուզի Գևորգյանը բնակվել է Ռուսաստանի Կրասնոդար քաղաքում:
Նա հանդիսանում է այն եզակի երիտասարդներից, ովքեր թողնելով հարմարավետ կյանքը հետևում վերադարձել են Հայաստան և նվիրվել ազգի ապագայի համար մղվող պայքարին: Սյուզի Գևորգյանը համարձակորեն և ակտիվորեն նվիրվել էր ընդդիմադիր քաղաքացիական գործունեության, մասնակցում էր Հիմնադիր Խորհրդարանի և Նոր Հայաստան շարժման միջոցառումներին: Վերջին ամիսների ընթացքում նա այն երիտասարդներից մեկն է, որ շատ ակտիվորեն մասնակցում էր սահմանադրական հանրաքվեի «Ոչ»-ի գործընթացին, իսկ հանրաքվեի արդյունքների կեղծումից հետո Գևորգ Սաֆարյանի և մյուս երիտասարդների հետ միասին մաս է կազմում այդ արդյունքները վիճարկող բողոքի գործողություններին, այդ թվում՝ Ազատության հրապարակի նստացույցին:
Հենց այդ հանգամանքն էլ դուր չէր եկել ռեժիմին և որոշեցին պատժել: Հայկական Վերածնունդը խորապես մտահոգված է հերթական քաղաքական բռնության կապակցությամբ և դատապարտում է քրեաօլիգարխիկ ռեժիմի բռնապետական գործողությունները: ՀՀ ապօրինի իշխանությունները կրկին անգամ օգտագործեցին քրեական տարրերին քաղաքական հաշվեահարդար իրականացնելու համար: Հատկանշական է, , որ ռեժիմն արդեն համարում է, որ մարսել է հանրքվեի կեղծիքը և կարող է բացահայտ կերպով արհամարհել ռչ միայն սահմանադրական կարգը և մարդու իրավունքները, այլ նաև ոտնահարում է ավանդական բարոյական չափանիշները՝ նենգորեն թիրախավորելով և բռնության ենթարկելով կանացի սեռի ներկայացուցչին, այն էլ այն օրը, երբ հայ ժողովուրդը տոնում է Սուրբ Ծնունդը:
Ակնհայտ է մի ցավալի իրողություն, որ Հայաստանը ալևս անշեղորեն շարժվում է դեպի բացահայտ բռնապետություն, որտեղ իշխող ուժը ոչ մի միջոցի առջև կանգ չի առնում ընդդիմությունը չեզոքացնելու և իր աշխանությունը հարատևելու համար: Այս պայմաններում ռեժիմի դեմ քաղաքական պայքարը վերածվում է ազատագրական պայքարի: Կոչ ենք անում բոլորին և հատկապես սփյուռքին միանալ այս ազատագրական պայքարին»:
.gif)
